ATA Latino America a celebra 10 aña
ORANJESTAD – Recientemente, a celebra e di 10 aniversario di e oficina di Aruba Tourism Authority pa e mercado di Latino America.
Minister di Turismo, Transporte y Labor, mr. Wendrick Cicilia, a bishita Bogota, Colombia, pa e ocasion aki. E gesto aki ta subraya e compromiso firme di Aruba pa e mercadonan di Latino America.
Ademas, e ta un reaccion directo na e peticion di stakeholdernan y ATA Latino America mes, kende a pidi pa ricibi backup di gobierno pa nan esfuersonan di mercadeo.
Un futuro cu meta ambicioso
E strategia di turismo di Aruba ta enfoca riba mercadonan mas afluente, manera Argentina, Brasil, Chile, Peru y mas cu claro, Colombia. E meta p'e aña aki ta un crecemento di 6% den bishita di turistanan di Latino America y un crecemento di 15% den e mercadonan di "long haul" (Argentina, Brasil, Chile). Minister Cicilia a indica cu lo surpada e cifranan aki, danki na e trabao incansabel di e oficina di ATA Latino America, hunto cu e sosten politico di e ministerio.
Encuentro cu partnernan clave
Durante e biahe, Minister Cicilia a reuni cu e director di ATA Latino America, Jordan Schlipklen-Croes y a enfatisa cu e aumento den e cantidad di turista for di Latino America ta un resultado di e trabao structural haci den e añanan cu a pasa. Awe, mas cu nunca, e bishita aki tin como meta principal pa mantene y fortifica e base cu a establece pa e oficina den e ultimo 10 añanan.
Minister Cicilia a remarca cu e producto Aruba ta keda fuerte y atractivo den e mercado Latino Americano y cu e trabao ta pa conserva, mantene y fortifica e posicion aki pa futuro.