Aruba Tourism Authority ta presenta Autentico Aruba Culinary Festival 2024.

Un evento cu lo duna enfasis na e variacion culinario cu Aruba tin pa ofrece y e talento excepcional di nos chefnan. E festival aki ta duna oportunidad unico pa explora e variacion rico di cuminda, pa descubri restaurantnan nobo, saboria, y pa aprecia cushina di calidad halto cu ta refleha e tradicion culinario y e diversidad cultural di Aruba. Cu mas di shen nacionalidad riba nos isla, e evento aki lo bira otro momento di celebracion di nos herencia cultural y e diferente saboran cu ta forma parti di nos identidad.

E festival lo sirbi como un plataforma pa e sector culinario por presenta nan producto, pa crea mas sosten y entusiasmo local, e lo uni tambe restaurantenan cu studiantenan culinario di EPB y EPI, y lo yuda na posiciona Aruba como un destinacion culinario na nivel internacional. Sin lubida e hecho cu ta spera cu e inSpira nos hobennan pa uni nan mes na e industria culinario vibrante na Aruba.

Autentico Aruba Culinary Festival ta dividi den dos parti:

• E prome parti lo conta cu un Autentico Restaurant Week: cu lo cuminsa entrante dialuna 7 di october te diabierna 11 di october, aki ta caminda cu restaurantnan participante lo presenta nan propio menu, diferente oferta, of eventonan special cu lo  publica riba e calendario di evento riba e website di Autentico. 
• E di dos parti di e festival lo conta cu e asina yama ‘Wilhelminastraat Culinary Festival’ durante e weekend di 12 di october y 13 di october na e historico Wilhelminastraat den centro di Oranjestad.

E evento aki lo duna e local y e bishitante e oportunidad pa disfruta di un variacion di cuminda y bebida na e diferente booth nan cu lo tin presente, ilustrando e mundo di gastronomia representativo di Aruba. Hunto cu esaki, lo tin entretenimento local y competencia di Bartender’s Brawl y Iron Chef Aruba riba e podio principal.

Kico por spera durante e evento?

Durante di e Bartender’s Brawl riba diasabra 12 di october, lo conta cu e di seis edicion di e evento aki na Aruba. Aki ta caminda cu varios bartender lo competi pa asina presenta bebidanan original di cocktail.
Durante di e competencia di Iron Chef na e podium principal riba diadomingo 13 di oCtober, tres chef lo competi pa asina prepara platonan special, hunto cu asistencia di studiantenan culinario di EPB y EPI.

Banda di esaki, e publico lo por spera un gran variedad di restaurant cu lo presenta dos di nan platonan na un prijs atractivo, mientras cu por gosa di talentonan musical local den e cayanan di Wilhelminastraat. Lo tin varios lugar cu por sinta, relaha, y disfruta di evento.

Pronto tur tickets lo ta disponibel riba pagina web www.autenticofestival.com. Cu compra di un ticket “Weekend Pass” na balor di AWG. 54,00 lo ricibi un credito di AWG. 30,00 cu lo por uza bek riba dianan di e evento. Of por cumpra un “Day Pass” na balor di AWG. 36,00, y ricibi un credito di AWG. 20,00 pa por uza riba e dia di e evento. Cada ticket ta inclui un kopi reuzabel, credito di cuminda y bebida, y entrada pa e competencianan di e Bartender’s Brawl y Iron Chef.
Lo haci  donacion na un bon causa cu e creditonan no a uza.

Sigui Autentico Aruba Culinary Festival riba Facebook, Instagram, y www.autenticofestival.com pa mas informacion.