Aruba Tourism Authority ta comparti resultado di ‘Local Sentiment Survey’

E prome sondeo a tuma luga na 2018 durante e periodo di celebracion di Dia di Himno y Bandera, y tabata planea pa ripiti cada dos aña. Na 2020 pa motibo di e pandema di COVID-19, no por a haci e sondeo y a na mei 2022, cu asistencia di diferente studiante di Universidad di Aruba, ATA a percura pa incorpora un metodo amplio pa colecta feedback, uzando encuesta online y den forma personal. 

Na maart 2024, a colecta data riba Plaza Betico Croes durante e Evento Cultural, riba dia di Himno y Bandera na varios Centro di Bario entre otro; San Nicolas, Savaneta, Brazil, Santa Cruz, Piedra Plat, na Royal Aruba Aloe y Museo Arkeologico. Varios negoshi a encurasha nan empleadonan pa participa, pero tambe studiantenan di Universidad di Aruba y Colegio E.P.I. a forma parti di e encuesta aki.

Un total di 3,583 persona a participa na e encuesta aki, di cual 2,053 tabata online y 1,530 tabata ‘face-to-face’. Despues di a check pa erornan (por ehempel encuestanan no completo), a establece e cantidad final na 2,592 encuesta. Basa riba e poblacion local di 107,566 (Central Bureau di Estadistica 2023), por conclui cu e total corectamente colecta tin un nivel di confiansa di 95% y un ‘margin of error’ di 5%. E resultado revisa di MGM Source, ta indica cu e cantidad di 2,592 encuesta tin un nivel di confiansa di 99% y un ‘margin of error’ di 2.5% cu ta surpasa e minimo necesario.

E resultado a indica cu mayoria di participantenan di e encuesta ta reconoce cu turismo ta un industria clave y e motor di e economia di Aruba. 68% di e participantenan di e encuesta a expresa di ta contento cu e industria di turismo. Bou di esnan cu ta traha directamente den e sector di hospitalidad, esaki ta 75%, cu ta contento cu e industria.

Actualmente, A.T.A. ta tumando pasonan proactivo pa redefini e modelo di turismo a traves di ‘Responsible Tourism’ y finalmente ‘Regenerative Tourism’. Accionnan lo dirigi nan mes riba esaki cu aspiracion pa Aruba avansa y posiciona su mes como lider den practica di turismo responsabel y sostenibel pa generacionan cu ta sigui. 

Aruba ta sigui ta un destinacion faborito den region di Caribe cu un demanda halto. Aunke cu esaki ta e caso, ta di reconoce cu nos destinacion ta na un crusada. Ta importante pa reconoce un cambio di sentimento di turismo mundialmente. E impacto negativo excesivo di turismo riba e comunidad anfitrion y ambiente natural ta real, y na Aruba nos no ta immuun na e ola di sentimento mundial aki.

Resultado

Den un escala di 1 pa 5, 68% di e participantenan di e encuesta a ‘rate’ turismo cu un punto di 4 (positivo) pa 5 (extremadamente positivo). Den total, esaki ta refleha un impacto faborabel cu un averahe di 3.9 punto. Di otro banda, entre e 32% di e participante cu a ‘rate’ extremadamente negativo pa neutral, 19% a opta pa duna un comentario adicional.

A percura pa segmenta tur comentario den topico principal. E topiconan mas menciona tawata; e volumen di turista riba e isla, repercusion economico (relata na labor, prijs di vivienda, e ganashi cu no ta yega na e pueblo, etc.), envolvimento di e comunidad limita cu un enfoke riba turista, e necesidad pa mehora e infrastructura, y consideracion pa cu nos medio ambiente/naturalesa.

Esnan cu a participa ta varia y ta categorisa pa generacion di Gen Z (entre 18 y 27 aña, cu participacion di 12%) Millenials (entre 28 y 43 aña, cu participacion di 35%), Gen X (entre 44 y 59 aña cu participacion di 35%), y generacion Boomers (60 aña bay ariba, cu un participacion di 18%).

E reparticion a base di districto ta indica cu 32% di e participantenan a bini for di districto di Paradera / Santa Cruz, 27% for di e districto di Noord / Tanki Leendert, 22% for di Oranjestad, y 19% for di Savaneta / San Nicolaas. Un notable 82% di e participantenan ta emplea na e momento cu a completa e encuesta, y 70% ta den e rango di edad di 28 pa 59 aña. Aproximadamente 68% di e participantenan ta un mayor cu un average di dos yiu. Nivel di educacion entre e participantenan ta varia, cual 47% tin un Bachelor’s Degree of mas halto.

E resultado di e Local Sentiment Survey ta obtenibel riba www.ata.aw/knowledge-base