Aruba Tourism Authority Sui Generis 15 aña construyendo turismo duradero

Anteriormente conoci como e Toeristenbureau a establece A.T.A. riba 1 di januari 2011 como un organisacion Sui Generis, un termino latino cu ta significa unico den su tipo. E structura aki ta duna A.T.A. autonomia y agilidad pa opera di manera independiente, semper den interes di Aruba y su comunidad.

E rol di A.T.A.

Aruba Tourism Authority ta fungi como un Destination Marketing and Management Organization (DMMO). Den e rol aki, A.T.A. ta trece hunto stakeholders di turismo, ta fomenta colaboracion y ta duna direccion strategico pa e desaroyo duradero di Aruba como destino, tanto local como internacional.

Turismo ta e pilar economico principal di Aruba. A funda A.T.A. cu e meta pa fortalece e sector aki a traves di innovacion, cooperacion y un vision di largo plazo.

15 aña di impacto

Desde su fundacion na 2011, A.T.A. a contribui na un crecemento fuerte y cu por midi den sector di turismo di Aruba:

• 94% aumento den entrada di ingreso turistico (Tourism Receipts)
• 43% aumento den cantidad di bishitantenan
• 82% aumento den RevPAR (entrada pa camber disponibel)
• 36% aumento den turismo di crucero

E resultadonan aki no solamente ta refleha progreso economico, sino tambe e posicionamiento duradero di Aruba como un destino di calidad halto.

Persona ta central

“Pero e no ta bay solamente pa cifra, ni percepcion, sino pa e realidad cu nos ta bibando tur dia. Un industria modelo pa henter e region,” segun Ronella Croes, CEO di Aruba Tourism Authority.
“Un economia fuerte y resiliente, banda di un demanda semper halto. Tur esey ta bon! Pero nos enfoke awendia ta pa mehora loke falta regulacion, coreccion y adaptacion. Asina so por garantisa miho balans y cu nos ta alcansa un nivel unda e turista ta contento pero e pueblo tambe”. 

E enfoke ta centra riba hende lo sigui guia A.T.A. tambe den futuro.

Balor Halto – Impacto Abou (High Value – Low Impact)

A.T.A. ta traha segun e principio di Balor Halto – Impacto Abou. Esaki ta nifica:

• mas valor pa cada bishitante
• menos presion riba nos naturalesa y comunidad
• proteccion di cultura, medio ambiente y calidad di bida

E meta ta logra un balansa duradero entre crecemento economico y bienestar di Aruba y su habitantenan.

Vision 2025–2035

Cu e introduccion di e Multi-Annual Corporate Strategy 2025–2035 (Strategia Corporativo Multianual 2025–2035 - MACS), A.T.A. a drenta Plateau I di su plan di futuro. E enfoke ta riba:

• turismo di calidad en bes di turismo di cantidad
• preservacion cultural
• cuido di medio ambiente
• bienestar di comunidad

E vision aki ta wordo refleHa den e slogan:
“Un Aruba dushi pa biba, ta un Aruba dushi pa bishita.”

Midi loke ta conta

Cu instrumento manera e Tourism Impact Model, A.T.A. no ta midi solamente e entrada economico, sino tambe e costo real y e beneficio di crecemento. Esaki ta yuda garantiSa cu turismo ta beneficia henter e isla, mientras ta  protege recurso natural y calidad di bida.

Localmente ancra, globalmente activo

Aruba Tourism Authority ta opera for di su cede principal na Aruba, cu oficinanan na Hulanda, Colombia y Merca. Huntu, e ekiponan aki ta promove Aruba den diferente mercado internacional.

Cuater balor central ta guia A.T.A. den un nobo etapa di turismo:
Curashi, Compasion, Curason y Curiosidad.

E balor nan aki ta inspira innovacion, liderazgo cu proposito y cuido pa comunidad y medio ambiente—awor y den futuro.