Aruba tin tres sorto di cocolishi endemico protegi.
ORANJESTAD – Directie Natuur en MIlieu (DNM) ta informa tocante e tres sorto di cocolisho endemico protegi di Aruba.
Den e edicionnan anterior por a lesa e informacion di e cocolishinan Conasprella wendrosi y Conus hieroglyphus tambe yama Arubaconus hieroglyphus cerca investigado local. E cocolishi Conus curassaviensis ta e di tres sorto di cocolishi di lama endemico pa Aruba. E ta un molusco gastropodo marino di e famia Conidae. E ta bestia bibo paden di e casca cu nos ta yam'e ‘slak’ di e genero Conus y e ta un ‘slak’ venenoso. Cu e djente ‘radular’ cu ta manera un harpun chikito nan por staca y pica hende of nan presa. Nan ta saca e veneno pa defende nan mes of pa venena nan presa pa asina come. E djente 'radular' di e sorto aki ta distinto n'e otronan den e grupo di Conus cedonulli, e ta mas largo.
E sorto aki ta registra un variacion di colornan di e casca, tin blanco cu manchanan preto, oraño/cora cu blanco y maron cu blanco. E casca ta sinti solido pero na e punta e tin liñanan grof. E cocolishi ta parce cu e tin pikpik riba dje. E cocolishi aki por bira mas of menos 5 centimeter.
Aunke su nomber cientifico tin e palabra curassaviensis pa referi na isla Corsou, toch e sorto aki ta hay’e na Aruba so. Documentacion cu ta data aña 1742 a splica e origen etimologico di su nomber. Su habitat ta den santo blanco grof cerca di coral den profundidad entre 2 meter y 9 meter.
DNM ta gradici investigado local Leo Ros pa su contribucion pa cu e informacion y documentacion. E investigado local conhuntamente cu e investigado internacional David P. Berschauer a yuda DNM cu potret di e 3 sortonan di cocolishi endemico di Aruba. Cu e informacion aki por yuda pa yega na conservacion di e area den cercania di Arashi unda e sortonan ta habita. Y e peticion ta bay na comunidad en general pa no coy esakinan pa pronk, tampoco pa bende riba mercado cu coleccionistanan.
