Aruba ta titula campeon den Serie del Caribe y ta cla pa Little League World Series

E logro aki ta habri caminda, despues di 13 aña, pa e seleccion nacional por bataya den Little League World Series cu lo tuma luga na augustus proximo na Williamsport, Pennsylvania. 

Despues di a bataya fuertemente na Corsou durante e campeonato di Serie del Caribe, nos hobennan a hunga e partido final hopi intenso contra e ekipo di Republica Dominicana, manteniendo tur esnan cu a sigui e final sinta na rand di nan stoel. Diasabra anochi, den un stadion yen yen, Aruba ta derota Republica Dominicana 2-0 pa titula campeon di Serie Del Caribe. 

Na nan yegada na Aeropuerto Internacional Reina Beatrix, famia, amigonan y fanaticonan a duna e heroenan un caluroso bon bini na Aruba. Minister di Finansa y Cultura Xiomara Maduro, den nomber di Gobierno, hunto cu sr. Rafini di RBC como sponsor, a entrega un medaya na e seleccion campeon y a saca un potret oficial. Esnan presenta a celebra e logro cu ritmo di Brassband, pa despues e seleccion, bao escolta policial, haci un recorido di campeon y despues a ricibi un treat di parti di Gobierno. 

E seleccion di Aruba awo ta prepara pa augustus nan biaha pa Williamsport na Pennsylvania pa representa Caribe completo den e gran World Series y ESPN lo transmiti esaki en bibo.