Aruba ta sigui explora opportunidad nobo pa comercio y inversion cu Colombia

E mision ta enfoca riba conecta comerciante Colombiano cu mercado Arubano, identifica oportunidadnan concreto pa comercio y crea y fortalece relacionnan comercial sostenibel entre Aruba y Colombia.

E companianan participante ta representa un oferta varia, cu entre otro producto agricola fresco, fruta y berdura procesa y congela, koffie, cacao, bebida y servicionan digital.

Durante e programa di dos dia, un di e metanan tabata pa e delegacion di Colombia conoce mercado local di mas cerca. Cu bishita na Ling & Sons Food Market y PriceSmart Aruba, e empresarionan a observa productonan cu actualmente ta disponibel, formato y tamaño di pakete, marca, prijs y e manera ta presenta eproducto importa na consumidor Arubano.

Logistica tambe ta forma un parti importante di e mision. Particularmente importante pa producto fresco, refrigera y congela, factornan manera cadena di frio, disponibilidad di container refrigera, frecuencia di conexion, tempo di transporte y posibilidad di consolidacion ta crucial pa determina viabilidad comercial. Pa cu esaki, a organisa un bishita na ASTEC cu a duna e delegacion oportunidad pa conoce miho con transporte y logistica di mercancia pa Aruba ta funciona den practica.

Otro aspecto importante ta cumplimento cu rekisitonan di importacion. Productonan alimenticio destina pa importacion comercial mester cumpli cu varios diferente rekesitonan aduanero, sanitario, otro rekisitonan di entrada aplicabel na Aruba. Conocemento di e rekisitonan aki for di principio ta yuda empresarionan determina cua producto tin potencial y cua pasonan ta necesario pa drenta mercado Arubano.

Un di e momentonan central di e mision ta Colombia Showroom Aruba, unda e 19 companianan participante a presenta nan producto directamente na importador, distribuidor, supermercado, hotel, restaurant y otro cliente potencial na Aruba. Ademas di crea contacto comercial, e showroom ta brinda oportunidad pa e empresarionan ricibi feedback directamente for di mercado local, dialoga y oportunidad di adapta nan proposicion comercial unda ta necesario y unda cu por.

Desde 2023, Aruba tin presencia na Bogota via Aruba Trade & Investment Office (ATIO), ubica den Holland House Colombia. E oficina ta funciona como punto di contacto pa comerciante y inversionista y ta contribui na desaroyo di relacion comercial y inversion entre Aruba y Colombia. E colaboracion cu Holland House Colombia tambe ta brinda acceso na un network comercial y instrumentonan pa orientacion di mercado, matchmaking, desaroyo comercial, misionnan comercial y networking.

E infrastructura aki ta brinda un base importante pa sigui desaroya e relacionnan comercial cu ta establece durante e mision.

Minister Wever a reconoce y gradici e team di DEZHI y EXPRODESK, cu durante e ultimo añanan a eherce hopi trabou y a contribui na fortalecemento di relacion entre companianan Colombiano y mercado Arubano, incluyendo sosten di Colombia Showroom. Nan experiencia ta contribui na crea y facilita relacion comercial entre proveedor potencial y comprador potencial y facilita un seguimiento structura despues di e mision.

Gobierno di Aruba ta mira e Mision Comercial Exploratorio como un paso adicional den fortalecemento di relacion economico entre Aruba y Colombia,cu ya cuminsa na 2023, cu enfasis riba diversificacion di mercado, oportunidad nobo pa sector priva y creacion di relacion comercial sostenibel. Gobierno ta spera cu e dos dianan aki lo habri porta pa mas oportunidad nobo y un relacion comercial cada biaha mas fuerte entre Aruba y Colombia.