Aruba ta habri un capitulo nobo pa un futuro sostenibel
ORANJESTAD - Despues di casi un siglo di dependencia economico di industria di petroleo, Aruba ta cera definitivamente un capitulo historico pa habri caminda pa un futuro mas limpi, sostenibel y innovativo.
Desde 1924, cu e yegada di Lago Oil and Transport Company na San Nicolas, Aruba a bira un punto strategico den e mundo di refinacion di petroleo. LAGO, propiedad di EXXON, a crece te bira un di e refinerianan mas grandi di mundo, dunando trabao na mas cu 10.000 persona y sostene e economia di nos isla durante varios decada.
Un poco despues, Arend Petroleum Company Ltd., comisiona pa Royal Dutch Shell, a habri su porta na 1927 na Druif, Oranjestad, den e mes edificio cu awor ta sede di Departamento di Recurso Humano (DRH). E compania a opera te 1953, y aunke mas chikito, su impacto riba e desaroyo economico di Aruba tabata significativo.
Sinembargo, e era di refineria a yega na su fin na 1985, ora cu Lago a cera su operacionnan. Miles di famianan Arubiano a busca un bida nobo den otro pais, mientras Aruba mes a busca su caminda nobo. Durante e añanan cu a sigui, companianan manera Coastal Corporation, Valero Energy Corporation y CITGO Petroleum Corporation a intenta rebiba e industria, pero sin exito duradero. E ultimo intento, un acuerdo cu CITGO na 2016, a termina oficialmente cu e ciere di e refineria na 2019 pa motibo di sancionnan imponi pa gobierno Mericano riba PDVSA, compania mama di CITGO.
Durante hopi aña, Gobierno di Aruba a busca un operador nobo, pa reanima e refineria y e economia di San Nicolas. Pero mirando e rumbo mundial, den cual sostenibilidad, energia limpi y respet pa medio ambiente ta bira prioridad global, Prome Minister di Aruba mr. Mike Eman, cu respaldo di su gabinete, a tuma un decision historico:
Cera pa semper e capitulo di petroleo y destina e area di refineria pa desaroyo di actividad comercial alternativo y ambientalmente faborabel.
E industria di petroleo a sirbi su proposito historico, pero e mundo a cambia. Aruba mester move pa un modelo economico cu ta basa riba sostenibilidad, innovacion y energia limpi.
E decision aki ta representa mas cu un cambio di industria, e ta un cambio di mentalidad. Despues di 100 aña di dependencia riba petroleo, Aruba ta reafirma su compromiso cu un futuro sostenibel pa su pueblo.
E plan pa e area di refineria ta inclui desaroyo di zona industrial berde, espacio pa innovacion tecnologico, y oportunidadnan di empleo den sector di energia renobabel y economia circular.
Pa yuda Aruba den e transicion energetico importante aki, Gobierno Hulandes lo duna Aruba 110 miyon florin, pero tambe lo sondea e posibilidad pa duna sosten tecnico y di conocemento pa sanea e area di e manera mas eficiente y miho posibel.
Prome Minister Hulandes demisionario Dick Schoof, durante su bishita cortico na Aruba, a elogia Premier Eman pa su decision y a recorda cu ta hopi tata y mama di famia a cria nan famia trahando den e sector aki. "Esaki ta haci e decision aki mas emocional ainda pa e comunidad di Aruba, pero durabilidad ta rekeri decision balente".
