Aruba ta formalisa cooperacion cu Brasami pa tratamento di personanan cu adiccion bou curatela.
ORANJESTAD - Durante dianan 3 y 4 di augustus 2026, na Directie Volksgezondheid Aruba, DVG, a tuma lugar dos sesion di trabou cu participacion di diferente stakeholder den cadena di cuido y husticia na Aruba.
Entre otro, representante di Respaldo, Stichting Hunto, Veiligheidshuis Aruba, Ministerio Publico, Reclassering y Stichting Brasami di Corsou a participa na e sesionnan.
Meta di e sesionnan tabata pa fortalece colaboracion entre e diferente instancianan y traha riba contenido y proceduranan relaciona cu un convenio entre Pais Aruba y Stichting Brasami, unda cuido obligatorio bou instruccion di hues por ta realisabel. Esaki pasobra na Aruba no tin e structura disponibel pa brinda e cuido obligatorio pa adiccion intra mural aki.
Diaranson 5 di augustus 2026, Minister di Salud Publico, Asunto Social, Cuido di Adulto Mayor y Maneho di Adiccion, drs. Mervin Wyatt-Ras, a firma e convenio. Cu firma di e convenio, Gobierno di Aruba lo por haci uzo di servicio di Brasami pa un grupo specifico di personanan cu adiccion cu ta of a buta bou curatela di hues.
Ta importante pa enfatisa cu e programa aki no ta destina pa cualkier persona cu un problema di adiccion. E programa ta explicito pa trata personanan cu ta of ta keda buta bou curatela di hues unda un trayecto specialisa y intensivo ta necesario. Pa cu e proceso aki tin un comision di indicacion pa cuido largo den exterior cu ta fungi como consehero den henter e trayecto.
E programa na Brasami lo tin un duracion di seis luna y ta consisti di diferente fase:
- Detoxificacion
- Creacion di structura y estabilidad
- Tratamento intensivo
- Resocialisacion y reintegracion den comunidad.
E fase nr 4 di resocialisacion y reintegracion lo continua na Aruba, cu acompañamento y sosten di e diferente partnernan local. Esaki ta esencial pa yuda e persona aplica loke ela siña durante su tratamento, reconstrui su bida y reintegra gradualmente den famia y comunidad.
Durante e sesionnan, Brasami a comparti conocemento basico tocante adiccion, e problemanan cu por ta na raiz di adiccion y su vision riba tratamento. Tambe a trata e criterianan pa admision, e documentacion necesario, e procedura di registracion y responsabilidad di cada instancia den e trayecto.
Cu e cooperacion aki, Aruba ta traha na un cadena di cuido mas structura y conecta, unda tratamento na Corsou y acompañamento na Aruba ta forma parti di un solo trayecto. E meta final ta pa ofrece e grupo vulnerabel aki un oportunidad realistico pa recuperacion, estabilidad y un reintegracion sostenibel den comunidad.
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw
