Aruba ta firma Agenda di Clima di Reino

E punto di agenda principal di e reunion tabata e agenda climatico, den cual cada un a firma nan compromiso pa cu e 8 puntonan stipula den e agenda. Cu e firma aki Aruba ta duna su compromiso pa sigui den e pasonan pa cumpli cu e metanan y haci Aruba un pais mas sostenibel y fuerte contra e cambio climatico. 

Cambio climatico ta causa pa e temperatura cu ta aumentando, y esaki por sinti den yobidanan mas fuerte, cu ta ocasiona daño na nos infrastructura, coral y costa. 

E idea pa yega na un agenda climatico pa henter Reino, a nace aña pasa na Aruba durante e conferencia di Energia & Clima cu Aruba a organisa hunto cu Minister Jetten. Aki ta unda Aruba a duna su compromiso, y Hulanda a compromete nan mes pa pone fondo disponibel pa asina yuda Aruba, Boneiro, Corsou, Sint Maarten, Saba y St Eustasius. 

Cu e firmamento di e agenda climatico, e paisnan a yega na un acuerdo climatico cu ta consisti di 8 punto:

1. Acelera e transcicion di energia y miho acceso na energia limpi y pagabel; 
2. Tin un infrastructura resiliente pa cu e cambio climatico; 
3. Mehora e maneho di awa y desperdicio; 
4. Stimula un economia circular y sostenibel; 
5. Intensiva proteccion di e ecosistema; 
6. Bin cu incentivonan economico y financiero;
7. Traha mas hunto y comparti e sabiduria y conocemento;
8. Monitoria y evalua.

Esaki ta e acuerdonan cu a palabra y firma durante e reunion, na unda cu Hulanda lo pone fondo disponibel pa e paisnan den Reino por cumpli cu e puntonan aki. 

Prome Minister Wever-Croes ta sumamente satisfecho cu e resultado di e reunion aki, na unda por mira cu despues di e conferencia aña pasa, awo tur cos ta birando mas concreto na unda Hulanda lo pone su fondonan y cu e ta dispuesto pa yuda nos logra cumpli cu e agenda climatico.