Aruba ta continua cooperacion cu Holland House Bogota
ORANJESTAD – Ministerio di Finansa, Asunto Economico y Sector Primario ta anuncia continuacion di e cooperacion cu Camara de Comercio Colombo Holandesa miho conoci como Holland House na Bogota.
Meta di e prolongacion pa e periodo 2026- 2027 ta pa facilita mas comercio entre Aruba y Colombia.
Un di e meta di maneho economico di gobierno ta cooperacion cu paisnan den region manera Colombia. Cooperacion directo cu Holland House Bogota ta confirma e compromiso pa facilita mas inversion y comercio entre ambos pais. Presencia permanente riba mercado colombiano ta contribui na amplia Aruba su posicion como isla atractivo pa inverti y tambe yuda facilita cu negoshinan local explora y subi e mercado colombiano.
Aruba Trade & Investment Office na Holland House ahabri oficialmente na 2023 durante e prome mision comercial di Aruba na Colombia. Desde e momento ey, e oficina a demostra su balor como un punto di contacto importante pa empresarionan y inversionistanan Arubiano cu ta desea di explora oportunidadnan comercial na Colombia.
Holland House Colombia ta un di e tres Camaranan di Comercio bilateral mas importante na Colombia, cu aproximadamente 500 empresa afilia y oficinanan na Bogota, Medellin y Barranquilla, sostene pa un team di consultornan specialisa. E cooperacion aki ta duna Aruba acceso directo na un red profesional fuerte y experticio den investigacion di mercado, matchmaking, business development, misionnan comercial y eventonan di networking. E ta un inversion den e futuro economico di Aruba.
E cooperacion ta consisti di dos componente principal. Aruba lo sigui mantene un Trade & Investment Office completamente equipa y claramente identifica den Holland House Colombia, cu tambe ta sirbi como un espacio temporal di trabou pa empresarionan Arubiano durante bishitanan comercial.
Ademas di esaki, Holland House Colombia lo sigui brinda apoyo na Ministerio durante cuatro ora pa siman. Esaki ta permiti cu Aruba ta beneficia di conocimiento local y apoyo comercial profesional, mientras cu e Gobierno ta logra un uzo eficiente di recurso publico sin e necesidad di mantene un establecimiento huridico propio na Colombia.
E plan di trabou pa 2026–2027 ta enfoca, entre otro, riba:
- Atrae inversionnan Colombiano pa Aruba;
- Posiciona Aruba como un “hub” strategico pa region di Caribe y Latinoamerica;
- Brinda apoyo na empresanan internacional cu ta considerando Aruba como un destino pa inversion y establecimento;
- Fortalece e competitividad di empresanan Arubiano den mercado Colombiano;
- Identifica oportunidadnan nobo di exportacion;
- Organisa misionnan comercial, seminarionan, reunionnan empresarial y eventonan di networking;
- Facilita cooperacion logistico entre Aruba y Colombia.
Continuacion di e cooperacion estrecho cu Holland House Colombia ta un compromiso di Gobierno pa sigui brinda e apoyo necesario na nos comerciantenan y facilita mas negoshi y inversionan entre Aruba y Colombia. “Aruba Trade & Investment Office” ta forma parti di e maneho economico pa nos companianan crece y nos consumidornan tin mas acceso na productonan na prijsnan bentahoso pa asina yuda baha e costo di bida na Aruba segun Minister di Finansa, Asunto Economico y Sector Primario mr. Geoffrey Wever.
Pa mas informacion, por tuma contacto cu Departamento di di Asunto Economico, Comercio y Industria.
