Aruba ta anfritrion di UPAEP Reunion Regional di Estrategia Postal-Aduana, Reforsando compromiso pa cooperacion y innovacion regional

E encuentro di alto nivel aki ta uni experto y lidernan di e region pa duna atencion na e reto- y oportunidadnan den sector postal y di aduana.

Minister di Adunto Economico, Comunicacion y Desaroyo Sostenibel, Geoffrey Wever a duna bon bini na e participantenan cu un discurso cual a enfatisa e compromiso di Aruba pa stimula cooperacion y innovacion den e industria vital aki. "E surgimento di e-commerce, digitalisacion di servicio y aumento di demanda pa comercio inter-frontera a transforma con nos ta mira operacionnan postal y di aduana," e Minister a bisa.

Ta enfoca riba haya solucionnan tangibel pa e retonan cu ta bini den e servicio postal global cu ta evolucionando y e modelonan tradicional mester  redefini. Den e contexto aki, e colaboracion entre aduana y servicio postal ta mas crucial cu nunca.

E ubicacion strategico di Aruba historicamente a haci'e un hub pa comercio y comunicacion. Door di tene e evento aki, Aruba ta reafirma su rol como lider den cooperacion regional.  

E intercambio eficiente di dato, modernisacion di regulacionnan, y e adopcion di tecnologianan nobo ta fundamental pa e futuro exito di e industria aki. Den dialogo, e reunion aki ta trata di consolida confiansa y fortalece relacionnan pa "streamline" procesonan, reduci tardansa, y aumenta siguridad den e region. Esaki sigur ta desaroyonan cu ya a cuminsa inicia na Post Aruba tambe, mirando e necesidad urgente pa modernisa su modelo comercial.