Aruba a ricibi DuCaPHEN y MoBoCon 2026 pa fortalece colaboracion regional den salud publico.
ORANJESTAD- Aruba ta anfitrion di dos encuentro regional importante den e siman aki: e conferencia anual di Dutch Caribbean Public Health Expertise Network (DuCaPHEN) y e reunion anual di MoBoCon (Mosquito Borne Control Network), reuniendo expertonan, profesionalnan di salud publico y specialistanan di control di vector for di diferente pais y isla den Reino Hulandes.
DuCaPHEN ta un red di colaboracion cu a establece pa fortalece cooperacion den salud publico, vigilancia epidemiologico, preparacion pa emergencia, promocion di salud y con pa responde na crisis entre Aruba y e otro islanan di Caribe Hulandes. E encuentro a brinda un plataforma pa intercambio di conocemiento, experiencia y miho practicanan den diferente area di salud publico.
Paralelamente, durante dianan 2, 3 y 4 di juni, Aruba tambe tawata anfitrion di e reunion anual di MoBoCon (Mosquito Borne Control). E proyecto aki ta reuni cada aña representantenan di e teamnan responsabel pa control di vector y mosquito na tur e islanan Hulandes. Durante tres dia, participantenan a comparti experiencia, resultado di investigacion, reto y solucionnan practico relaciona cu prevencion y control di enfermedadnan transmiti pa sangura.
Parti di e programa a tuma luga den sala di reunion di Directie Volksgezondheid (DVG), unda participantenan a participa den presentacionnan y discusionnan tecnico. Y atardi, e grupo a move pa diferente locacion den comunidad pa comparti experiencia practico y observa metodonan di control di sangura na Aruba.
E dos encuentronan aki ta mustra e importancia di colaboracion regional pa fortalece preparacion y respuesta contra desafionan di salud publico cu nos region ta enfrenta. Tambe ta brinda oportunidadnan valioso pa siña for di otro, fortalece relacionnan profesional y desaroya solucionnan conhunto pa proteha salud di nos comunidadnan.
Como anfitrion di DuCaPHEN y MoBoCon 2026, Aruba ta reafirma su compromiso cu cooperacion regional, innovacion y fortalecemento continuo di salud publico na beneficio di tur habitante den Caribe Hulandes.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba, sigui nos den WhatsApp Channel, ricibi tur informacion den Aruba Health App, bishita www.dvg.aw, yama 5224200 of manda email na servicio@dvg.aw.