Aruba a celebra diversidad cultural na Encuentro Multicultural
ORANJESTAD – Riba 17 di mei, 2025, den cuadro di e celebracion mundial di Dia Mundial di Diversidad Cultural pa Dialogo y Desaroyo, Prome Minister di Aruba, mr. Mike Eman hunto cu Minister di Turismo, Transporte y Labor mr. Wendrick Cicilia, a asisti na e di binti edicion di e Encuentro Multicultural Aruba, cu a tuma luga na Plaza Libertador Betico Croes.
E evento, organisa pa Departamento di Cultura, Gobierno di Aruba y UNESCO, tabata un homenahe na e rikesa cultural cu Aruba ta representa. Un isla cu un mescla unico di idioma, tradicion y origen, ta haci di Aruba un testimonio bibo di con diversidad por uni pueblo den un solo comunidad.
Durante e celebracion, Prome Minister Eman a enfatisa e importancia di un evento manera e Encuentro Multicultural, cu ta bay mas leu cu un acto simbolico. "E evento aki no ta un custumber, sino un compromiso pa paz, empatia y e bon comun. Un pais cu ta florece, ta paso su mayor rikesa ta su hendenan, ta su diversidad y su alma," Prome Minister Eman a expresa den su discurso na un multitud cu ta procedente for di tur skina di mundo.
E anochi multicultural tabata yena di color, sabor y musica. Na e cantidad diverso di kiosko, tabata ofrece productonan autentico manera arte, cuminda tipico, musica tradicional, relato historico y expresion cultural. E celebracion aki ta netamente locual ta pone Aruba riba mapa como un pais cu ta brasa diversidad, un ehempel cu otronan por sigui.
Prome Minister a gradici tur esnan presente, reconociendo nan como e motor tras di nos comunidad vibrante y inclusivo cu a sa di biba den convivencia y construi e Aruba di pasado, presente y di futuro.