Artista Elvis Tromp ta duna color na su mural na San Nicolas 12 aña despues

E mision tabata hopi mas cu djis pinta un muraya: e mural mester representa hospitalidad, amabilidad y e dedicacion di e pueblo Arubano na turismo. Elvis a mira e trabou como un manera pa duna bek na pueblo, un contribucion di su talento na un isla cu su hospitalidad y amabilidad ta un di e puntonan fuerte cu ta haci Aruba diferente den region. E idea tras di e mural tabata mustra netamente e cualidadnan cu Aruba ta conoci p'e. Pa Elvis, hospitalidad ta algo cu ta biba den nos hendenan y ta parti di loke ta yuda Aruba crece como destinacion turistico.

Pa crea e diseño, Elvis no a copia un imagen existente. El a cuminsa di cero, trahando cu sketch tras di sketch, te ora cu e concepto a bira e mural cu ta conoci awe na entrada di San Nicolas. E mural ta conta diferente aspecto di San Nicolas y Aruba. Den e obra bo ta mira e paisahe di nos isla, cadushi y e seronan, e turistanan explorando cu mapa den man, y e momentonan di hospitalidad unda un persona ta comparti algo cu un turista. Tambe tin un escena di lama cu ta reforsa e conexion entre Aruba, turismo y hospitalidad. Pero pa Elvis, e mural tabata tambe un manera pa pone San Nicolas riba mapa. Na momento cu Elvis Tromp tabata pinta e mural, San Nicolas tabatin masha poco muraya artistico. Durante e proceso, hopi hende a para pa wak, y nan a expresa nan alegria di porfin tin algo bunita y diferente riba caya. E mural a bira un punto di interes pa San Nicolas. Turista y local a cuminsa para pa saca potret dilanti di dje. E turistanan tabata wak e trabounan y saca potret di dje. Pa Elvis, esey tabata un muestra cu e mural tabata cumpli cu su proposito: pone atencion na San Nicolas, mustra su identidad y duna bishitantenan un mirada riba e hospitalidad y cultura di San Nicolas.

12 aña despues

Despues di mas cu un decada, Elvis Tromp ta bolbe traha riba su obra. E mural cu Elvis a crea na 2014 awe ta haya un retouch danki un biaha mas na aporte di ATA y Ministerio di Turismo, Transporte y Labor. E iniciativa ta cay perfectamente den e vision di gobiernopa revitalisa e casnan di Benrhardstraat na San Nicolas. Pa e artista esaki tin un nificacion special. Durante e trabou, Elvis ta mira cu hopi hende ta para atrobe pa observa e mural, ta saca potret y comenta riba e trabou. Aunke e mural tabata den un estado cu mester di atencion, e reaccion di publico y bishitantenan ta mustra cu e obra nunca a perde su importancia. Awor e ta haya su bida bek. Pa Elvis, e momento tambe ta un confirmacion di algo cu tabata den e idea original di e mural: hospitalidad, comunidad y orguyo di San Nicolas. E mural cu a nace 12 aña pasa como un regalo na pueblo, awor e ta haya color nobo for di e mesun artista cu a soñ'e, diseñ'e y pint'e.