April decreta como luna nacional contra abuso di mucha

Durante e luna aki, ta pidi tur ciudadano pa para keto na e problema serio di maltrato y abuso sexual di mucha.

Abusa di mucha tin un impacto desastroso riba bida di e mucha mirando cu e lo carga e herida aki pa resto di su bida. Pero esaki no solamente ta afecta e criatura sino tambe su famia. Apesar di tur esfuerso di Gobierno pa combati esaki, e no ta suficiente mirando cu estudio ta indica cu 99% di esnan cu ta comete e atrocidad aki ta un persona cu ta cerca di e victima mes. Esaki ta loke ta haci e lucha di Gobierno y e profesionalnan hopi mas dificil, pasobra cada ken tin e libertad pa laga nan yiunan cerca ken cu nan ta haya ta bon. P’esey ta importante pa decreta e luna di april como luna nacional contra abuso di mucha, pa crea conscienticacion cerca comunidad pa para keto un rato den e lucha contra abuso di mucha.

Gobierno di su banda ya a adapta varios ley y procedura pa yuda combati abuso di mucha:

• A aumenta castigo pa e abusadonan y a traha riba prevencion y educacion;
• a pone mas atencion na e veld social y a cuminsa traha den e Social Crisis Plan riba e problematica aki;
• a institui un Comision Nacional di Abuso di Menor, Bureau Sostenemi a bira Advies en Meldpunt Kindermishandeling (AMK);
• a institui un comision “Sexueel misbruik minderjarigen” bou guia di sra Lisette Gomez – un persona cu a dedica su bida na bringa e abuso aki, a bin cu varios ley pa proteccion di muchanan: Ley di creche, ley di proteccion di mucha y hoben, ouderenplan;
• a inaugura Centro pa Hoben y Famia pa yuda mayornan fortalece nan ‘parenting skills’;
• a institui e Departamento di Mucha y Hoben;
• a introduci FACT-team Kind en Jeugd di Sociaal Psychiatrische Dienst;
• a expande "crisis & opvang plekken"; na Fundacion Contra Violencia Relacional; 
• Stichting Reclassering a establece su Departamento di "Jeugd & Reclassering".

Hopi ta esnan cu kier wak castigonan halto pa e abusado, pero mester corda riba e bienestar di e victima, y mester haci un bon investigacion pa por yega na un castigo halto.