Apertura di SETAR Digital Week
ORANJESTAD – Riba 20 di october 2025 a tuma luga apertura di SETAR Digital Week, na e oficina principal di SETAR na Sero Blanco.
Minister di Vivienda, Infrastructura y Telecomunicacion, drs. Rene Herdé, asisti na ceremonia di apertura y a felicita SETAR pa su rol como pionero y su progreso continuo den tecnologia di telecomunicacion riba un isla chikito manera Aruba. Den su discurso Minister Herdé a subraya cu e tema di e dia, “Digitalisacion na tamaño humano”, ta refleha un enfoke importante: tecnologia mester sirbi pa mehora e bida humano.
Tecnologia tin un capacidad inmenso pa yuda nos den tur aspecto di bida. Si nos no ta haci uzo di dje, nos ta perde un oportunidad. E-learning ta un ehempel claro di con nos por combina avance tecnologico cu progreso humano.
Herdé a recorda cu no tabata hopi tempo atras cu un ambtenaar tabata trece un telegram personalmente na cas, y pa yama un famia den exterior mester a haci un collect call caro via operador. Awendia nos por yama, manda mensahe y hasta video call cu facilidad. Esaki ta mustra con mundo a cambia na un manera asombroso.
Minister Herdé a enfatisa cu e siman di Digital Week mester sirbi pa reflexiona riba unda Aruba ta para awe y ki direccion e pais kier tuma pa futuro.
Cu e capacidad tecnologico cu nos tin awe, kico mas nos por haci pa sirbi hende?
Segun e Minister, tur hoben na Aruba mester tin acceso na tecnologia pa logra su potencial educacional. Inclusion di tecnologia den e curiculo di enseñansa ta vital. Si nos no ta prepara e siguiente generacion pa un mundo digital, nos ta pone nan atras den e carera di progreso. Minister Herdé a conclui deseando SETAR exito y sabiduria pa continua ta un lider den progreso tecnologico di Aruba.
SETAR Digital Week
SETAR Digital Week a cuminsa dia 20 di october y pa un siman largo SETAR lo tin diferente presentacion pa publico general, adulto mayor, studiantenan y companianan unda cu lo comparti conocemento di diferente topico.
Durante e siman aki lo cubri topico nan manera: Fake News, Future Thinking, ChatGPT, CapCut, Social Media, Canva, Digital Budgeting, Cybersecurity y mucho mas.
Entrada ta gratis, pero ta rekeri registracion via www.setar.aw/digitalweek
Fecha: 20 - 24 october 2025
Orario: 9:00 - 4:30 PM
Luga: SETAR Conexion Center (Seroe Blanco)
Registracion: www.setar.aw/digitalweek
Nota: Por registra pa un sesion of tur.