Apertura di e tercer edicion di In The Picture oficialmente cu 20 participante
ORANJESTAD – Apertura di e tercer edicion di In The Picture a tuma luga oficialmente durante e kick-off cu dia 20 di augustus na John F. Kennedy Education Center.
E tercer edicion ta conta cu 20 participante, selecta for di clientenan di DAS cu ta ricibi Sosten Financiero of Guia Social. Participacion den e trayecto ta obligatorio y ta forma parti di e guia y sosten cu DAS ta brinda pa fortalece nan posicion y prepara nan pa drenta bek mercado laboral. E trayecto ta cuminsa entrante 24 di augustus 2026.
In The Picture ta un iniciativa di Departamento di Asunto Social (DAS), ehecuta conhuntamente cu Departamento di Progreso Laboral (DPL) bou di guia di Stichting Ja-IK Aruba. E trayecto ta stimula nan crecemento personal y profesional, fortalece habilidadnan y brinda e preparacion necesario pa mercado laboral.
E resultado di e di dos edicion ta demostra cu progreso ta posibel. Na februari 2026, 40 cliente di DAS a registra pa participa. Shete persona a drenta mercado laboral prome cu e trayecto a cuminsa. Di e 33 participante restante, 12 a logra drenta mercado laboral durante e trayecto. Esaki ta un total di 19 persona cu a drenta bek mercado laboral. Ademas, e trayecto a contribui na un cambio positivo den e mindset di e participantenan y na nan desaroyo personal, motivacion, determinacion y preparacion como profesional.
E resultado aki ta confirma e balor di continua cu un tercer edicion y di brinda un grupo nobo e oportunidad pa fortalece nan mes.
Durante e kick-off, Minist Minister di Salud Publico, Asunto Social, Cuido di Adulto Mayor y Maneho di Adiccion, Sra. drs. Melvin Wyatt-Ras a dirigi un mensahe na e grupo:
“E trayecto aki no ta un straf. Mira esaki como un oportunidad pa crece, pa descubri bo capacidadnan y pa sali for di bo comfort zone. Bo no mester tin tur contesta awe; bo mester ta dispuesto pa cuminsa,” Minister Wyatt-Ras a enfatisa.
Minister Wyatt-Ras a indica cu sosten social no mester funciona como un punto final, pero como un punto di salida pa hende fortalece su mes y traha pa mas independencia.
A gradici DAS, DPL, Stichting JA-Ik Aruba, tur trahado social y tur partner cu ta contribui na crea oportunidadnan concreto pa e participantenan. T desea e grupo nobo hopi exito y a invita cada participante pa tuma e siguiente paso cu curashi, confiansa y responsabilidad.
