Apertura di Conservation Management Office na Parke Nacional Arikok

E momento a marca un paso nobo den fortalecemento di e organisacion y su trabou di conservacion, mientras tambe a pone patrimonio arkitectonico y natural di Aruba den centro di atencion.

Durante e ceremonia, Prome Minister MikeEman a instala e seyo cu ta identifica e edificio historico como monumento protegi. Gobernador di Aruba, S.E. Alfonso Boekhoudt, a participa na apertura oficial di e oficina, sigui pa un recorido den e edificio.

Den su discurso, Eman a felicita ACF y tur e personanan y organisacionnan cu a contribui na realisacion di e proyecto. El a enfatisa cu proteccion di naturalesa ta un responsabilidad cu ta toca henter comunidad.

“Cada dia mas fuerte ta nos naturalesa,” tabata un di e mensahenan cu Prome Minister a enfatisa, señalando cu Aruba tin un patrimonio natural cu mester cuida y conserva. Segun Eman, e tarea aki ta exigi compromiso no solamente di un organisacion, pero di Gobierno, institucionnan y tur stakeholder cu, cada uno for di su propio area, tin un responsabilidad pa cu naturalesa.

Prome Minister Eman a resalta importancia di tin un organisacion fuerte dedica na conservacion, cu e capacidad pa supervisa, guia y reuni diferente actor rond di e mesun meta. Den e contexto ey, el a expresa su deseo pa e luga nobo sigui desaroya como un espacio caminda conocemento, colaboracion y conservacion por encontra otro.

Apertura di e Conservation Management Office ta sigui un relacion di trabou di 23 aña entre Gobierno di Aruba y ACF. Den ultimo periodo, ACF a tuma diferente paso pa profesionalisa y fortalece su organisacion, mientras su team dedica na conservacion a sigui crece.

Tyson Lopez, CEO di Aruba Conservation Foundation, a indica cu e oficina nobo ta crea un espacio caminda diferente unidad dedica na conservacion por traha mas cerca di otro, colabora, innova y desaroya proyecto y programa. El a enfatisa cu e magnitud di e tarea di conserva naturalesa ta haci colaboracion cu Gobierno, NGOnan y otro stakeholder indispensabel.

E Conservation Management Office lo reuni Research & Consultancy, Conservation Operations, Learning & Outreach y Terrestrial Conservation Unit, hunto cu e Chief Conservation Officer di ACF, Natasha Silva.

E proyecto a incorpora tanto e edificio monumental existente como un parti nobo. Orlando Hoevertsz di Hoevertsz Archi Design N.V. a splica cu e reto arkitectonico principal tabata precisamente integra ambos parti, respetando e caracter tradicional di e monumento mientras a crea un espacio funcional pa e organisacion.