Apertura 13th Annual Called to Wealth International Summit
ORANJESTAD – Riba 23 di juli a tuma luga apertura di 13th Annual Called to Wealth International Summit, teni na The St. Regis Aruba Resort.
E conferencia internacional, organisa pa Kingdom Chamber of Commerce, a reuni e lidernan di gobierno, comerciante, inversionista, ehecutivo y e lidernan spiritual for di diferente pais pa intercambia pensamento riba liderazgo, innovacion y desaroyo economico sostenibel. Prome Minister Mike Eman a keda ricibi pa Dr. K. Angela Pipersburgh, fundadora y presidente di Kingdom Chamber of Commerce.
Den su discurso, Prome Minister Eman a duna un bonbini na tur e delegadonan cu a bishita Aruba y a expresa su aprecio pa e oportunidad di intercambia pensamento cu e lidernan den comercio y e lidernan spiritual for di diferente parti di mundo. E a resalta cu liderazgo basa riba balor, colaboracion y servicio ta indispensabel pa sigui traha pa un futuro prospero y sostenibel.
Durante e encuentro, Prome Minister Eman a presenta na Dr. Pipersburgh un ehemplar di e buki Volk van Veerkracht, publica den conexion di 40 aña di Status Aparte y 50 aña di Himno y Bandera. E a splica cu e buki ta comparti un reflexion riba e desaroyo di Aruba durante e ultimo decada y cu e ta dedica na memoria di e prome Prome Minister di Aruba, Henny Eman.
Despues di e discurso, Dr. K. Angela Pipersburgh a expresa su gradicimento pa presencia di Prome Minister Eman.
