Airlift Committee a presenta resultado di e prome mita di 2024 y proyeccion pa e ultimo mita di 2024

E file aki ta den archivo.

ORANJESTAD – Dialuna 29 di juli 2024, Jo-Anne Meaux Arends, Aviation Business Development Executive di Aruba Airport Authority N.V. (AAA N.V.), den representacion di Airlift Committee a presenta e resultadonan di e prome mita di 2024 y alabes a duna e proyeccion pa e ultimo mita di 2024.

Presente na e presentacion tabata Minister di Turismo y Salud Publico, sr. Dangui Oduber, sra Ronella Croes y sra. Sanju Luidens di ATA, sra. Tisa LaSorte di AHATA y sra. Barbara Brown, Chief Revenue Development & Communications Officer di AAA N.V.

Durante di e prome 6 luna di 2024 Aruba a sigui crece den e area turistico. Aruba ta conta cu 26 aerolinea, ta conecta cu 32 ciudad y ta ofrece vuelonan non-stop pa 30 diferente ciudad.

E mercado di Merca ta keda esun mas grandi y fuerte pa Aruba. E gran mayoria di turista ta procedente di e estado di New York, sigui pa Massachusetts y Florida. Ademas a observa un tendencia creciendo for di e estado di California.

Ademas a presenta e proyeccion pa e di dos mita di 2024 y cifranan tentativo pa 2025, pero tambe a revisa e puntonan y strategia pa continua e desaroyo positivo di nos turismo.

Aruba ta keda un isla den demanda pa turista cual ta refleha den e cifranan di e prome mita di 2024. Esaki ta danki na e esfuerso colectivo di tur esnan cu ta traha incansablemente den e sector di turismo.

D.r.p.d. sra. Ronella Croes di ATA, sr. Dangui Oduber, Minister di Turismo y Salud Publico, sra. Jo-Anne Meaux Arends di AAA N.V. , sra. Tisa LaSorte di AHATA sra. Sanju Luidens di ATA y sra. Barbara Brown di AAA N.V.