Acto di firmamento pa lanta Fundacion Revitalization Bernhardstraat

Durante e acto di firmamento, Sra. Inky Richardson, Sr. John Hassell y Sr. Castello Lispier a firma oficialmente e akta pa funda e fundacion aki cu tin e tarea pa revitalisa e caya di Bernhardstraat y duna esaki un facelift completo.

Prome Minister mr. Mike Eman, hunto cu Chris James di Ministerio di Asunto General tabata presente na Chocolate City Restaurant na San Nicolas pa presencia e firmament di e acta.

Meta di e fundacion ta pa restaura e casnan den Bernhardstraat y trece nan bek den nan structura mas original posibel y lo cubri e casnan entre e Watertoren te na e crusada di Lagoweg. Lo restaura e casnan aki den e estilo pintoresco y colornan vibrante di Caribe cu ta representa e calor autentico di e comunidad di San Nicolas.

Prome Minister Eman a indica cu Gobierno, lo duna empuhe na e fundacion aki pa mira con por pone nan den contacto cu e habitantenan di cada cas y cu sosten di sector priva, lo embeyece e casnan aki. Ademas Gobierno lo revitalisa e infrastructura den e caya, manera e trottoir y vegetacion den parti di e caya pa haci esaki mas atractivo y contribui asina cu e meta di e fundacion Revitalization Bernhardastraat.

Mirando e cantidad grandi di personanan cu ta core den e caya aki pa bay Baby y Rodger's Beach y e area pariba, ta importante pa duna e caya un facelift y duna cada bishitante un toke di e calor di San Nicolas.

E revitalisacion di Bernhardtraat ta apenas e comienso y den futuro cercano lo expande e trabaonan di revitalisacion pa otro cayanan . San Nicolas tin hopi pa ofrece y gobierno lo yuda engrandece e area aki. Hunto cu e sector di arte, gastronomia autentico, arkitectura vibrante, beachnan bunita y desaroyo tumando luga, lo haci San Nicolas un centro turistico cu un historia profundo.