Accion di Bario Centro di Bario Brazil
ORANJESTAD – Riba 4 di september, ekipo di Accion di Bario, a drenta e bario di Rooi Kochi y Brazil pa duna servicio di limpiesa y atencion na cada habitante.
Prome Minister mr. Mike Eman, hunto cu Serlimar, DOW, Bureau City Inspector y Setar den e barionan ta lanta e interes den e habitantenan pa tene nan bario limpi.
Prome Minister Eman hunto cu Minister Mervin Wyatt-Ras, a haci un bishita na Centro di Bario Brazil cu e compromiso special pa e matanan di Brazil.
Den pasado Aruba tabata un pais cu hopi mas vegetacion compara cu awo, y tabatin un cantidad grandi di e matanan di brazil. Cu e palo di brazil, tabata traha boto y muebles, pero tambe a traha carbon. Esaki a causa cu awendia casi no a resta mata di brazil na Aruba. Ta pa e motibo aki, y den cuadro di e plan nacional di reforestacion, e mainta a planta un mata di brazil dilanti Centro di Bario Brazil. Ademas a planta un mata di guyaba, fofoti, shimarucu y granaatappel na Centro di Bario Brazil.
E plan Nacional di reforestacion, cu a haya e nomber "Ban Sembra Speransa", no solamente ta di vital importancia pa nos naturalesa y ecosistema, pero pa recobra nos matanan nativo cu casi a desaparece completamente for di nos isla.