A reparti buki “Snoop Doggy vindt een huisje” na muchanan di klas 3 di scol basico
ORANJESTAD – Dia 1 di october 2024, Minister di Transporte, Integridad, Naturalesa y Asunto di Adulto Mayor, Ursell Arends hunto cu Fundacion Snoop Doggy a bishita Maria Goretti College pa haci entrega di e buki “Snoop Doggy vindt een huisje”.
Un proyecto cu a cuminsa na 2023 pa educa nos muchanan di 3de klas riba e diferente aspectonan di cuido di un mascota.
Durante e bishita a duna presentacion interactivo cu ta toca e topico di cuido, entre otro con pa maneha carpata, cuminda diario, microchip, ehercicio, higiena y e sensitividad di oido di mascota ora ta trata klapchi. Hunto cu e team di Fundacion Snoop Doggy, muchanan tabata tin e oportunidad pa conoce e mascota Rohan.
E muchanan di klas 3 di Maria Goretti College a participa activamente den e presentacion interactivo, y a siña con ta lesa microchip di mascota.
Ta importante pa crea un sociedad unda doñonan di mascota ta mas responsabel. Evalua bo situacion bon prome cu busca un mascota pa evita situacionnan caminda no por sigui duna cuido pa e mascota. Hunto nos por traha pa crea un Aruba unda nos ta conoci no solamente pa nos hospitalidad, sino tambe pa nos manera cu ta atende cu animalnan domestico.
Educacion den e area di bienestar y cuido di animal ta algo cu Ministerio di Naturalesa a bin ta traha duro ariba dje y hunto cu proyectonan di conscientisacion, manera e buki di scol “Mi Mascota ta mi Responsabilidad” lo ekipa nos futuro generacionnan cu norma y balor cu lo transcende den futuro ora nan bira adulto responsabel den nos comunidad.
Esfuersonan colectivo lo sigura un comunidad cu mas empatia pa nos animalnan. Bon cuido y abundancia di amor ta haci e diferencia den un mascota su bida. Stima bo mascota!