A presenta propuesta di e maneho nobo di e K-9 unit di Gobierno
ORANJESTAD – Diahuebs 11 di juli, Prome Minister Evelyn Wever-Croes a reuni cu DRH y representantenan di Aduana, KIA y Cuerpo Policial relaciona cu e K9 Unit di Gobierno di Aruba.
Actualmente Gobierno di Aruba tin 23 cacho cu ta duna servicio na e comunidad. Nan ta traha cu Aduana, KIA y Cuerpo Policial. Cada departamento tin su propio maneho cu su propio reglanan y algun mas beneficioso cu otro. Prome Minister a duna di conoce cu algun siman pasa a informe di reto- y problemanan cu tin bou ehecucion di e maneho actual pa cual a convoca un reunion pa atende cu esakinan. Departamento di Recurso Humano (DRH) a lidera e trabounan pa un maneho nobo hunto cu sindicato di Polis, Aduana y KIA.
E motibo principal pa e maneho nobo ta pa pone e bienestar di e cacho na prome luga. Aruba tin un Ley di Cacho y mester trata tur animal na un forma digno y esey tambe ta conta pa e cachonan cu ta den servicio di Gobierno, y cu e maneho nobo aki lo garantisa esey.
Prome Minister ta gradici KPA, Aduana, KIA, e sindicatonan SADA, SPA, SEPPA, y DRH cu a traha hunto riba e maneho nobo. E siguiente paso ta conseho huridico y financiero pa asina formalisa e maneho aki.