A lansa material educativo "Mi Mascota" pa scol.

Un ekipo di profesional, a compila y traha e buki “Mi Mascota”, cu ta importante pa comunidad di Aruba, mirando e problematica specialmente di cacho riba caya. E responsabilidad di un mascota ta netamente responsabilidad di e doño di e mascota, y no di otro instancia. Apesar di esaki, Gobierno ta yuda combati e fenomeno aki for di diferente angulo, manera cu programa di sterilisacion, campaña di pintamento, promocion pa ta doño responsabel y a introduci e “Ley di Cacho”.

E material educativo aki ta yuda inculca e responsabilidad di ta un bon doño di mascota den futuro, for di un edad hoben. Muchanan en particular ta gusta tin un "puppy" pa hunga cu ne, pero na momento cu e cacho bira grandi, tin e tendencia di hala e cacho aki un banda y busca otro puppy. Esaki sigur no ta manera corecto pa trata un mascota. P'esey e material aki ta hopi importante pa siña nan con pa trata nan mascota y e deber cu ta bin cu e mascota. Un puppy no ta un responsabilidad temporal, sino uno pa bida largo. 
Ban hunto compromete pa ta doñonan mas responsabel di un mascota.