A inicia destaho publico pa yuda Santa Rosa, agricultornan y criadonan di bestia

E obhetivo ta pa por sigui brinda servicio den un forma mas rapido y alabes haci e trabounan necesario di renobacion y mantencion di diferente seccion den e departamento. 

Esaki pa sigura e sosten necesario na tur e agricultornan, criadonan di bestia como tambe na e otro clientenan di Santa Rosa cu ta activo den Aruba su  sector primario. 

E contratonan lo tin un duracion di 36 luna y e trabounan lo ta coordina door di e gerencia di Santa Rosa y evalua regularmente hunto cu e Ministerio di Sector Primario. Esaki cu e meta pa sigura cu ta ehecuta nan cu calidad.

E destaho publico aki tin como meta pa tuma un otro paso den e plan di gobierno pa fortalece Aruba su sector primario. Cu e cuatro contratonan aki, Santa Rosa lo tin mas capacidad pa responde na e necesidadnan di servicio na  e comunidad agricola y sigui brinda e sosten cu agricultor y criadonan di bestia ta conoce y aprecia.

E cuatro contratonan ta cubri diferente tipo di trabou cu Santa Rosa ta haci regularmente:

• Mantencion & Infrastructura (mantencionon di edificio, plomeria, electricidad basico, welding y instalacion di sistema di irigacion den areanan di plantacion, control di frustiamento);
• Trabounan di cuido diario di bestia (alimentacion diario, limpiesa di stal, control di salud di bestia);
• Trabou cu ekiponan pisa y asistencia y apoyo pa agricultura (preparacion di tera, cobamento di tera, drecha hekwerk, transporte di awa, mantencion di dam (rekisitonan di ekipo obligatorio ta aplicabel);
• Produccion di cultivo & Maneho di cunucu (preparacion di tera, planificacion di cultivo, control di yerba/plaga, cosecha/sortea, duna relato di produccion.

E ploegnan lo traha tanto ariba e tereno di Santa Rosa como tambe otro terrenonan pa ehecuta diferente trabou cu Santa Rosa ta ofrece na su clientenan.

Esaki ta nifica cu Santa Rosa lo bay beneficia di por haya e upgrading necesario pa mehoracion di e infrastructura existente cu tin hopi necesidad pa renobacion. Trabounan cu actualmente tin urgencia cu ne ta por ehempel trabounan di welder heki di un cura despues cu el a kibra, mantencion di stal, trabou cu ekipo pisa na  cunucunan cu mester prepara pa planta of tin necesidad di ekipo pisa pa trabounan di mantención, entre otro. Santa Rosa lo ricibi e upgrading necesario mediante e servicio di e contratistanan aki.

Un punto importante pa menciona ta, cu hopi di e servicionan cu Santa Rosa ta brinda ta subsidia door di Gobierno. Esaki ta permiti agricultornan y criadonan di bestia ricibi sosten profesional na un prijs accesibel. Door di amplia e capacidad di Santa Rosa, Gobierno ta inverti directamente den nos productor localnan y asina logra establece un sector primario mas fuerte y bon ekipa.

Minister di Finansa, Asunto Economico y Sector Primario Geoffrey Wever a indica cu e meta principal ta sigui mehora e servicio cu Santa Rosa ta brinda na e comunidad, fortaleciendo asina e Sector Primario di nos isla.

"Nos kier pa agricultornan y criadonan di bestia por haya e yudansa y sosten cu nan merece, ora nan mester di dje. E contratistanan aki lo duna Santa Rosa mas capacidad pa atende mas peticion y sigui brinda e servicionan cu nos productornan local ta conta riba dje pa sigui traha y produci. Inverti den Santa Rosa ta inverti den nos seguridad alimentario, den nos economia y den futuro di Aruba."

Companianan cu tin e experencia y capacidad pa ehecuta un of mas di e trabounan por participa den e destaho. Nan por inscribi pa un, varios of tur cuatro contrato, dependiendo di nan experticio. Por download e documento completo cu e condicionnan di participacion for di 8 di juli 2026 na e siguiente link https://bit.ly/4piVtco.  Por manda e preguntanan te cu 22 di juli 2026, mientras cu mester entrega e ofertanan no mas laat cu 18 di augustus 2026 pa 10:00 di mainta na oficina di Santa Rosa na Piedra Plat 114-A.

Cu e destaho publico aki, Ministerio di Finansa, Asunto Economico y Sector Primario ta sigui construi un Departamento di Agricultura, Cria y Pesca mas resiliente , cu por atende mas cliente, brinda miho servicionan y sigui ta un aliado confiabel pa tur esnan cu ta contribui diariamente na e desaroyo di nos sector primario.