A haci traspaso di mando na Prins y Pancho pa dirigi Carnaval 70

Prome Minister Evelyn Wever-Croes, den su discurso a expresa cu pa Gobierno e ta un placer y honor pa habri porta di e cas di gobernacion pa ricibi e celebridadnan di Carnaval 70. Ademas, Prins y Pancho di Carnaval 70 a lesa nan decretonan expresando nan deseo pa tin mas union, atencion pa nos muchanan y hobennan y pa Aruba uni y sostene Carnaval mas. Tambe tawatin algun peticion specifico pa diferente minister cual Minister President a comparti cu su coleganan en cuestion.

Prome Minister ta urgi mayornan pa preferibel no hiba muchanan hopi chikito parada di Carnaval. Pa e muchanan mas grandi ta consehabel pa cuida nan di e solo cayente, cuida nan oido uzando earplugs, duna nan suficiente cos di bebe, tene nan bon na bista y sigura cu nan lo goza di Carnaval. Un suplica a bay na tur adulto, pa no abusa di alcohol pa evita problema. Carnaval ta pa gosa na manera sano cu famia y amigonan y crea recuerdonan di e dushi celebracion aki.

A entrega e spada simbolico na e prins y pancho infantil pa nan proteha nos carnaval di mucha. Prins y pancho hubenil a ricibi e spada simbolico pa nan defende nos hobennan den carnaval, y nos prins y pancho grandi a ricibi e yabi cu ta simbolisa cu nan tin tur sosten y confiansa di Minister President pa habri y guia nos carnaval 70.

Prins y Pancho clasico a ricibi un yabi di ‘spare’ pa por si acaso e prins y pancho grandi jump dimas y perde nan yabi. Cada monarca como miembro di SMAC a ricibi un pin for di Prome Minister.
Por ultimo Minister President a gradici SMAC pa organisa Carnaval 70 y tambe tur participante, musico y pueblo en general pa haci Aruba su Carnaval 70, uno cu nos por ta orguyoso di dje.