A extende convenio cu Camara de Comercio Colombo-Holandesa “Holland House” na Colombia

Desde inicio cu a cera e prome convenio na 2023 cu Holland House diferente ya caba a  asisti companianan local pa crea conexionnan cu companianan Colombiano. 

Asina aki na 2023 Gobierno di Aruba hunto cu Departamento di Asunto Economico, Comercio y Industria (DAECI) a organisa un trade mission exitoso pa Colombia cu ayudo di Holland House Colombia. Un parti essencial di e trade mission aki tabata pa ta logra trece carni for di Colombia pa Aruba. Awe orguyosamente por bisa cu tur e rekisitonan pa realisa ta casi cla y pronto lo por cuminsa importa carni for di Colombia.

Por mira bek cu esaki a resulta den un contribucion positivo pa entre otro nos economia di Aruba door di expande e netwerk comercial.

Manera nos sa Aruba su economia ta uno chikito y ta depende riba importacion di mayoria di productonan. Cu un posicion strategico den Caribe entre Merca y America Latino ta esencial pa sigui explora oportunidad comercial cu ta na beneficio di nos comerciantenan y consumidornan. P’esey ta sumamente importante pa sigi intensiva e relacionan economico cu paisnan den region. E relacion cu Colombia tin cu Aruba ta uno esencial mirando e cercania y e potencial pa haci diferente tipo di negoshi.  

Minister di Finansa, Asunto Economico y Sector Primario Geoffrey Wever kier a gradici e team di Holland House pa e trabounan ya desplega como tambe e team di DAECI pa logra na un acuerdo pa asina extene e convenio entre Aruba y Holland House Colombia.