A cuminsa traha presupuesto di Pais Aruba 2027

Hunto cu Departamento di Finansa a duna informacion relevante na tur departamentonan cu ta cay bao di Ministerio di Finansa, Asunto Economico y Sector Primario.

Pa coordina y entrega prioridadnan di maneho pa 2027 conforme e normanan presupuestario  ancra den ley, Departamento di Finansa a presenta e handleiding “Begrotingsvoorschriften en richtlijnen” cu ta contene e fechanan di loke tur mester entrega segun ley ta prescribi. Meta di esaki ta pa Parlamento di Aruba ricibi e Presupuesto 2027 na tempo riba prome di september 2026.

Presupuesto 2027 lo bira e prome presupuesto di gobierno den cual lo aplica e concepto di “Policy-based budgetting”. Esaki ta encera cu lo presenta banda di prioridadnan di maneho tambe lo presenta cuanto e implementacion di esaki lo costa. Esaki ta un stap importante den un maneho financiero responsabel y duradero den cual lo brinda transparencia riba con ta uza  entrada di gobierno ta implementacion di maneho na beneficio di desaroyo di Aruba.

Durante e sesion informativo Minister di Finansa, Asunto Economico y Sector Primario Geoffrey Wever a subraya e importancia di un bon cooperacion y comunicacion entre cada ministerio y su departamentonan pa yega na un presupuesto 2027 cu ta refleha e prioridadnan di maneho di gobierno y ta cumpli cu e normanan di presupuesto manera ancra den ley.

Minister Wever ta gradici Departamento di Finansa pa coordina e proceso pa traha e presupuesto 2027. Ta sumo importante pa hunto cu departamento delinea e prioridadnan di maneho cu ta refleha e vision y maneho di gobierno. Aruba ta dal un paso nobo den con ta traha presupuesto, un reto pero sigur lo trece e transparencia necesario y na beneficio di desaroyo di Aruba segun minister Wever.