A celebra 150 aniversario di Holland America Line
ORANJESTAD - Recientemente, e compania crucero, Holland America Line, a celebra
nan 150 aniversario di existencia y nan 65 aniversario bishitando Aruba como
destinacion crucero.
Pa e ocasion historico aki, Holland America Line a invita Gobierno di Aruba y prensa
local pa celebra hunto cu nan. Minister President Evelyn Wever-Croes y Minister di
Turismo Dangui Oduber, hunto cu Director di Aruba Ports Authority (APA) Marc Figaroa
y Voorzitter di Raad v. Commissarissen, David Dubero, tabata presente na e festividad
special aki y a ricibi un recorido exclusivo di e barco di Holland America Line unda a
presencia e dedicacion di e linea crucero cu nan operacionnan sostenibel. E bishita no
tabata solamente un celebracion di e historia, sino un testimonio di e compromiso di e
compania pa responsabilidad ambiental.
Ademas, ehecutivonan di Holland America Line a anuncia cu pronto tur nan cruceronan
lo pasa door di un transformacion di diesel pa Gas Natural Liquido (LNG), un paso
significativo pa reduci emision di carbon y concentra asina ariba un futuro mas
faborabel pa medio ambiente.
Minister Oduber a felicita Holland America Line, den nomber di Gobierno di Aruba,
pa celebracion di nan 150 aña y nan aniversario bishitando nos dushi isla pa 65 aña.
Hunto cu un vision pa un futuro sostenibel, e logro significante aki ta marca un
momento di triunfo pa tanto Holland America Line como pa turismo sostenibel rond di
mundo.