A acelera e proyecto di expansion na aeropuerto
ORANJESTAD – Riba 7 di februari 2026, Minister di Turismo, Transporte, Labor, mr. Wendrick Cicilia conhuntamente cu e miembronan di Hunta di Supervision di Aruba Airport Authority, CEO di AAA Johnny Andersen, Parlamentario Jennifer Arends-Reyes y demas stakeholders tabatin un recorido na e proyecto di expansion Gateway 2030.
E proyecto Gateway 2030 ta hopi importante pa e facilidad di aeropuerto, nos economia y nos turismo y ta di un magnitud sumamente grandi, encerando un inversion di mas cu 500 miyon florin. Gateway 2030 ta den cuadro di un vision di Aeropuerto di Aruba y Gobierno di Aruba, pa asina por sigui provee un experiencia di calidad, eficiencia, siguridad y comodidad, cu ta elementonan cu un aeropuerto mester por brinda.
Ya caba a termina cu e “baggage handling system” y e “check in hall nobo”, actualmente e sistema nobo di atende cu maleta por procesa 2000 maleta den menos di 1 ora y ta conta cu tecnologia moderno.
E proyecto ta den e parti cardinal di e construccion cu ta e parti di expansion, cu lo consisti di tres gate adicional, un bridge cu ta conecta e facilidadnan di aeropuerto cu e gates nobo. Ta premira cu e aña aki lo termina cu Fase 1B.
“Manera cu e proyecto ta progresando, e lo ta cla prome cu aña 2030”, Minister Cicilia a expresa.