188 participante ya a cuminsa cu e Leiderschapsprogramma Land Aruba

Leiderschapsprogramma ta un trayecto di capacitacion pa liderazgo ehecuta door di Relevance for di Hulanda y Departamento di Recurso Humano (DRH) y financia den Landspakket. E programa ta enfoca riba fortifica liderazgo cu tin cu guia e proceso di cambio y desaroyo structural den e aparato publico di Aruba

En total 300 lider den sector publico ta participa den tres nivel di entrenamento, adapta na diferente funcion. Cada participante ta sigui e trayecto den un grupo di 15 persona. E programa ta inclui 360 grado feedback, un kick-off sesion cu ehercicio, informacion y intercambio, estudio online, encuentronan di intervision y coaching individual y elaboracion di un plan di cambio pa nan propio team. E trayecto ta culmina cu un of dos sesion di feedback den cual ta midi e resultado, pa asina haci e crecemento evidente.

Na october 2025 a tuma luga e kick-off pa tur 21 grupo den Renaissance Convention Center. Actualmente 188 participante a cuminsa caba, y pronto tur grupo lo ta activo. Evaluacionnan inicial ta mustra entusiasmo y aprecio pa contenido y calidad di entrenamento y ta spera cu e programa lo contribui na fortificacion di liderazgo den e aparato gubernamental.

Ademas, como parti di e condicionnan di e destaho via Hulanda, parti di e inversion lo beneficia e comunidad Arubano den forma di Governance & Leadership Tracks pa organisacionnan boluntario. E iniciativa aki ta coordina door di CEDE Aruba.