15 escritor, 1 cosecha
ORANJESTAD - Na juni / juli 2023, Biblioteca Nacional Aruba a organisa dos curso di Skirbimento Creativo, uno pa principiante y uno pa esnan avansa, duna pa escritor Vi Frank Jr.
Sr. Frank ta escritor di entre otro e prome "thriller" na Papiamento, titula “Damnatio ad Bestias” (Condena n’e Bestianan), y e coleccion di storia misterioso titula “Outpost Alto Vista”, un obra den e genero di "Cosmic Horror".
Mescos cu na final di e curso duna na 2021, caminda a duna e alumnonan oportunidad pa publica un coleccion di nan storia y poesianan, e biaha aki atrobe sr. Vi Frank jr a duna su cursistanan e oportunidad pa entrega storia y poesia, pa di e manera aki atrobe saca un publicacion colectivo. Na 2022 a publica e coleccion titula ‘Maraca, un sentimento Caribense' produci den diferente storia y poesia local. Un produccion cu 8 escritor cu a participa na e curso di cual sra. Noris van Lis a entrega e titulo ganado.
E aña aki e produccion ta inclui obranan di no menos cu 15 escritor cu a participa na e dos cursonan (principiante y Avansa). E titulo di e produccion ta ‘Halado, Un coleccion di storia y poesia local’, di cual Ida Croes a entrega e titulo ganado.
Diabierna 1 di maart, Biblioteca tin e placer di presenta no solamente e produccion aki, pero Vi Frank Jr. lo sorpresa un y tur cu presentacion di un buki nobo, cual titulo y contenido el a sa di mantene secreto. E evento aki ta cuminsa pa 5or di atardi te 7or di anochi na Biblioteca Nacional na Playa.