1.227 pensionado no mester haci declaracion di inkomstenbelasting mas

Esaki ta valido entante e aña fiscal 2023. E pensionadonan aki lo no ricibi e formulario di declaracion (aangiftebiljet) di inkomsten-belasting di awor en adelante. Si e pensionado ta casa, esaki ta conta tambe pa e casa. Den e dianan venidero e pensionadonan lo ricibi un carta na cas cu mas informacion. 

A base di e declaracionnan di inkomstenbelasting di 2021, a constata cu tin pensionadonan cu nan entrada ta consisti unicamente di e pensioen di biehes di SVB Aruba. Alabes tin pensionadonan cu ta casa y cu e casa no tin entrada of e entrada ta consisti solamente di e pensioen di biehes di SVB Aruba.  Pa e motibonan aki y door cu e entrada di e pensionado y esun di su casa ta bou di e suma liber di impuesto di Afl. 30.000 pa aña, e suma di inkomstenbelasting ta nihil (cero). 

Si acaso den futuro, e pensionado of su casa cuminsa ricibi otro entradanan banda di e pensioen di biehes di SVB Aruba, e ora ta necesario pa tuma contacto cu Departamento di Impuesto pa evalua si mester registra e pensionado bek pa inkomstenbelasting.  

Ta importante pa informa cu no a kita tur pensionado for di e registro di inkomstenbelasting. E pensionadonan cu banda di e pensioen di biehes di SVB Aruba tin otro entradanan manera: pensioen di trabou den pasado sea na Aruba of otro pais, huur di cas of apartamento etc. tin cu keda haci declaracion di inkomstenbelasting tur aña.  

Pa mas informacion, por yama Departamento di Impuesto na telefon 522 7423 of 522 7424.