World Wetlands Day 2024: Wetlands and Human Wellbeing.

E campaña 2024 ta pone enfasis riba e urgencia cu nos mester tin pa actua pa preservacion y restoracion di e ecosistema aki cu ta asina rico na biodiversidad. Esaki ta sostene bienestar di hende y ta inspira culturanan unico.

E tratado internacional "The Convention of Wetlands" ta adopta desde 2 di februari 1971 como e prome acuerdo multilateral ambiental na nivel mundial y ta e unico acuerdo dedica na un ecosistema specifico. Na 2021, Asamblea General di Nacionan Uni a adopta un resolucion cu a establece 2 di februari como Dia Mundial di Wetlands. 

Wetlands na Papiamento ta similar na areanan di saliña, areanan cubri pa matanan di mangel, pero e ta encera hasta rifnan di coral. Pa un uzo global ta referi na e palabra wetlands.
Wetlands ta ocupa aproximadamente 6% di e superficie di mundo. Esaki ta un area na unda tin awa salo of awa dushi manera ta yam’e awa brak.

Wetlands di awa dushi ta rooi, riu, lagoen y area banda di un riu cu ta inunda durante temporada di yobida. Wetlands ta un ecosistema esencial cu ta brinda humanidad un cantidad di servicio cu ta vital pa nos salud, economia y bienestar. Algun di e servicionan ta entre otro; purifica awa, promove biodiversidad, provee alimentacion y protege contra efectonan di cambio climatologico. Wetlands tin un rol crucial pa mantene e planeta den condicion saludabel. Na e area di wetlands hende ta bay pa relaha y promove paz mental.

Apesar cu e ta brinda asina hopi servicio, toch e ta na peligro pa disparce. Desde 1970, un tercer parti di wetlands na mundo a disparce y esunnan cu tey ainda, ta disparciendo tres biaha mas lihe cu e mondinan.
Dia Mundial di Wetlands ta un oportunidad pa nos eleva nos voz na fabor di wetlands y compromete nos mes pa proteha nan. Directie Natuur en Milieu ta invita tur hende pa uni na esfuersonan pa restauracion di wetlands di nos pais, pa sigura cu nan ta keda saludabel
pa generacionnan cu ta bin.

Aki nos ta inclui algun accion cu nos por tuma pa proteha wetlands:
•    Comparti potret di wetlands;
•    Proteha e wetlands existente;
•    Restaura wetlands cu a bay atras;
•    Reduci uzo di kimiconan y pesticida cu por ‘run-off’ bay den area di wetlands;
•    Conserva awa;
•    Promove un estilo di bida sostenibel;
•    Haci accion di limpiesa den area di wetlands. No kita mata of destrui locual ta natural.

Historia a demostra cu hende y wetlands tin conexion importante. Nos ta depende di otro
pa nos bienestar. Ban uni na e proteccion y restauracion di wetlands na Aruba, entre otro na Spaans Lagoen, asina generacionnan cu ta bin tambe por disfruta di nan. DNM ta urgi un y tur pa comparti storianan riba e plataforma social di preferencia y inclui e ‘hashtag’ #WWD2024 #WetlandsandHumanWellbeing #WetlandsandPeople #ActforWetlands
#DNMAruba