Workshop Mini BOSS for a Day – Inspirando e lidernan di mañan tabata hopi interactivo y educativo
ORANJESTAD - Riba 16 di october, Departamento di Asuntonan Economico, Comercio y Industria mediante su unidad di IDEA, a organiza e workshop di “Mini BOSS for a Day”, un actividad interactivo y educativo pa muchanan di entre 11 y 13 aña di edad.
Cu un grupo di 21 participante, a dirigi e workshop riba 3 pilar importante:
- Creatividad – coverti ideanan den algo real
- Confiansa – practica pa kere den bo mes y den bo ideanan
- Pensamento Empresarial – transforma ideanan inteligente den plannan chikito di negoshi
E workshop a keda presenta door di sra. Louella Croes-Ras, Policy Advisor-Business Development IDEA di Departamento di Asuntonan Economico, cu tambe a presenta e parti con pa pitch un idea di un negoshi, caminda tur mucha a haya e oportunidad di presenta nan ideanan di negoshi dilanti di e grupo. Maske, cu na start di e workshop, nervionan a hunga un rol cerca e muchanan, pero na momento di pitch nan ideanan, nan a presenta cu siguridad y orguyo.
Na final di e workshop, cada mucha a ricibi un certificado di reconocimento pa nan esfuerso, creatividad y participacion.
E dia aki, tabata uno yena cu energia, inspiracion y talento. Danki na tur mayornan, coleganan y colaboradonan cu a haci e activitad aki posibel.
Sigui nos riba Facebook page @Idea-Aruba pa haya mas infomacion tocante nos workshopnan y otro actividadnan venidero.