WEB Aruba N.V. y Seven Seas Water Group a firma acuerdo pa planta #3 di SWRO

Prome Minister Evelyn Wever-Croes, tabata presente durante cermonia di firmamente pa construccion di e tercer planta di Seawater Reverse Osmosis (SWRO), cu lo contribui cu un minimo di 16.500m³ di awa potabel pa dia.  

E planta nobo (SWRO-3) ta parti di WEB su plan di termino largo y su Water Road Map pa satisface demanda continuo di awa, manteniendo suministro confiabel. E planta nobo lo reemplasa e actual facilidad temporal di produccion di awa. Lo construi e planta SWRO3 riba tereno existente di WEB y ta planea pa ta operacional na mita di 2026. E proyecto aki ta un logro grandi pa WEB y pa Aruba ya cu esaki lo optimalisa significantemente WEB su capacidad di produccion di awa sigurando cu por satisface e demanda di awa di bebe di calidad na nos ciudadanonan y bishitantenan.

Posibel reducion di prijs di awa den futuro

Segun Prome Minister, e proyecto aki lo hiba Aruba den un direccion mas sostenibel y por garantisa suficiente awa pa nos isla. Esaki lo aumenta e confiansa den e planta y tambe por yega na reduci e prijs di awa mirando cu e planta nobo lo depende menos di heavy fuel oil cual ta afecta e prijs di produccion di awa.
Cu proyectonan asina, por garantisa cu semper tin awa di bon calidad, awa pagabel y cu por confia riba dje.