Vivienda moderno pa adulto mayor

Na Aruba tin un falta grandi di tipo di vivienda asina pa adultonan mayor. Pa e motibo aki Gobierno di Aruba a acorda cu lo pone fondonan disponibel pa construccion di vivienda pa nos grandinan.

Un vivienda ta mucho mas cu simplemente algun bloki riba otro cubri cu un dak, mas bien un vivienda mester ta un hogar. No por simplemente duna adultonan mayor un cas y laga nan bay biba den isolacion. Un bida solitario y sin atencion adecuado no ta saludabel pa ningun hende. E aspecto social mester ta parti integral ora ta papia di vivienda moderno.

Gobierno lo aloca 20 miyon florin pa FCCA den forma di un prestamo pa por traha mas vivienda social di cual por lo menos 25% mester ta dirigi na construccion di vivienda pa esnan di edad avansa.

Un vivienda ta un instrumento cu por uza pa bringa isolacion bao di nos grandinan. Vivienda moderno ta haci un ambiente social posibel. Esaki ta parti di e Deltaplan, den cual ta pone enfasis riba e pensamento di acercamento social (sociale benadering), basa riba e pensamento cu salud mental ta mes valioso cu salud fisico. A haci hopi avance riba e parti curativo, pero awo mester mas atencion pa e parti preventivo.

FCCA, ademas di ta un partner importante, ta e trendsetter na Aruba riba e tereno di vivienda moderno y nan proyectonan ta mustra otro inversionistanan cu proyectonan asina tambe ta factibel.  

Asunto di vivienda tabata un topico principal den e Foro Nacional pa Adultonan Mayor na october 2023 den cual Gijsbert van Herk, Presidente di directiva di Staedion cu ta opera mas di 40 mil cas na Den Haag y vecindario, a duna un presentacion amplio di nan specialisacion riba tereno di cas pa adultonan mayor. Cu e experticio y guia di Staedion, Gobierno no mester inventa e wiel, pero lo por scohe e modelonan cu ta pas miho pa nos.

A reparti asunto di vivienda pa adulto mayor den 5 grupo di atencion. 

• Tin un grupo cu kier keda den nan propio hogar, pa esey ta trahando diferente forma pa reforsa y asisti e cuidadonan (mantelzorg);
• Tin un grupo den casnan di cuido y pa esaki tin diferente proyecto andando pa reforsa e servicio y garantisa calidad;
• Tin esnan cu kier desaroya proyectonan comercial, y aki e tarea di ministerio ta pa stimula y facilita esakinan;
• Pa e grupo cu mester di asistencia na nivel di casnan di cuido ta preparando un plan integral pa amplia e capacidad;
• Pa tur adulto mayor lo tin facilidad di dagverblijf, cual ta e proyecto di Pasadia cu ta expandiendo debi na demanda.