Union Europeo ta contribui cu fondo pa e Plan di Accion Nacional pa Desaroyo Duradero & Inclusivo
ORANJESTAD – Den cuadro di e vision di Ministerio di Asunto Economico pa por logra e transicion pa yuda reduci gasto y emision di CO2 pa autonan di Gobierno, Aruba a ricibi sosten for di Union Europeo.
Recientemente, a entrega e prome 4 autonan electrico di Departamento di Asunto Economico, Comercio y Industria (DEZHI) como parti di e programa piloto pa e transicion pa autonan electrico of hibrido den ful Gobierno.
Despues di a haci un estudio di mercado hunto cu DOW, a haci tambe un inventario detaya di e autonan di Gobierno y e opcionnan disponibel na Aruba. A cuminsa cu e autonan di lease den uzo na DEZHI, a firma un acuerdo cu Elmar na april ultimo, unda cu Elmar lo percura pa e infrastructura di puntonan di recarga pa autonan electrico na Sunset Plaza, caminda DEZHI ta localisa actualmente.
E plan y vision aki a keda presenta na GO-Facility (Green Overseas) pa Minister di Asunto Economico Geoffrey Wever hunto cu DEZHI y DOW en busca di sosten tecnico y financiero como tambe e implementacion di e proyecto aki. E esfuerso aki tabata uno exitoso mirando cu e programa di Green Overseas (GO) y Union Europeo (EU) a aproba y opta pa financia esaki.
Na mes momento e compania Expertise France (EF) lo ta encarga pa realisa e proyecto aki, cu e meta di contribui na un desaroyo duradero y inclusivo di e paisnan/teritorio pafo di Europa y tambe Reino Hulandes. Pa esaki a aloca €190.000 pa realisa e transcion pa autonan electrico di e departamentonan gubernamental. Cu e programa piloto di transicion aki Aruba ta demostra cu e colaboracion aki ta un ehempel di con por haci uzo di fondo di Union Europeo cu ta destina pa contribui den teritorio pafo di Europa.
GO-Facility a saca un destaho publico internacionalmente cu e enfoke riba regulacion di prijs pa e mercado di energia na Aruba na un nivel macro economico. Ultimo dia pa entrega esaki ta 16 di september 2024.
Cu e reduccion di gasto operacional y di emision di CO2 di auto na Aruba nos ta promove miho calidad di bida, proteha naturalesa y contribui na frena cambio climatico. Gobierno di Aruba a tuma e rol ehemplar aki cu lo stimula sector priva y otro paisnan den region pa sigui e paso aki.