UNESCO Aruba a inaugura Traveling Poster Exhibition: Slavery

E exhibicion a pasa durante 2024 na diferente embahada y oficina regional di Nacionnan UNI, na Biblioteca Nacional di Trinidad & Tobago y Museo Tula na Corsou. Cu cooperacion di partners di ministerionan di Cultura y Educacion, a logra traha un ruta interesante pa e exposicion, cu lo hiba nos di biblioteca Nacional pa UNESCO, Educampus Aruba, Museo Arkeologico, Scol di Arte na San Nicolas y Archivo Nacional. Na cada localidad e exposicion lo haña un toke diferente ya cu e lo ta den un otro setting, cu otro publico of cu actividad adapta.

E exhibicion aki ta presenta un serie di 14 posters desaroya door di Rijksmuseum, conteniendo relatonan profundo y personal di e periodo di sclavitud colonial Hulandes, 10 storia personal, 3 poster introductorio y 1 mapa mundial. Ademas a enrikese pa e publico di Aruba cu:

• E film ‘Francisca y Eugenio’, dirigi y produci door di sra. Rebecca Roos, cu ta conta e
  historia di Famia Ecury, un historia di resiliencia y perseverancia.
• Un poster di esclavo ‘Thomas’ basa riba informacion di Archivo Nacional. E poster ta
  conta un storia di resistencia;
• Diferente buki riba e topico di sclavitud.

E exhibicion aki ta uno biahero, e lo ta den Biblioteca Nacional na San Nicolas te cu 18 october y
despues lo cambia di lugar.

E exhibicion aki ta un cooperacion di UNESCO Office for the Caribbean na Jamaica, EducationUSA, UNOCA, Archivo Nacional, Museo Archeologico Aruba, Biblioteca Nacional, Educampus Aruba y UNESCO Aruba.

E esfuersonan aki ta refleha e compromiso di nos comunidad internacional y local pa
reconoce y balora nos pasado y pa uza e conocimento aki pa construi un futuro
inclusivo.