Un prik, gran proteccion. Influenza no ta djis un simpel griep.
ORANJESTAD - Influenza, conoci den boca di pueblo como griep, ta un malesa infeccioso causa pa e virus di influenza.
Aunke hopi persona ta recupera sin haya complicacion, influenza por causa complicacion serio, problema respiratorio, hospitalisacion y den algun caso, hasta fayecimento.
E riesgo di complicacion ta mas halto cerca:
- Adulto mayor di 60 aña of mas;
- Adulto y mucha menor di 60 aña cu cierto malesa of condicion medico cu ta debilita nan sistema di defensa;
- Hende muher na estado cu indicacion medico;
- Ciudadanonan inmobiel riba cama.
P’esey ta importante pa e grupo di personanan aki proteha nan mes tur aña contra influenza.
Dicon vacuna ta importante?
E vacuna ta prepara e sistema di defensa pa reconoce y combati e virus di influenza. Esaki ta yuda reduci e posibilidad di complicacion grave. Vacunacion no ta ofrece proteccion 100%, pero si un persona vacuna haya influenza, e malesa generalmente por presenta den un forma menos severo.
Vacuna no solamente ta proteha e persona cu ta vacuna. E ta yuda tambe reduci e posibilidad di transmision na otro personanan vulnerabel, manera adultonan mayor, pashent cu un defensa abou y personanan cu condicionnan cronico.
Dicon ta necesario vacuna tur aña?
E virusnan di influenza ta cambia regularmente. P’esey, tur aña specialistanan ta adapta e composicion di e vacuna na e variantenan cu probablemente lo circula durante e temporada di influenza. Ademas, e proteccion cu e vacuna ta ofrece por disminui cu tempo.
Pa mantene e miho proteccion posibel, ta recomenda pa personanan den e gruponan di risico vacuna contra influenza tur aña, preferiblemente prome of na principio di e temporada di griep cu ta cuminsa alrededor di oktober di cada aña.
No warda te ora bo ta malo pa arepenti di no a vacuna contra Influenza. Si bo ta pertenece na un grupo di risico, vacuna na tempo y proteha bo mes contra complicacionnan serio.
Personanan di 60 aña of mas mester trece nan carchi di AZV pa haya e vacuna gratis. Personanan cu ta pertenece na un grupo di risico, pero cu no tin 60 aña ainda, mester trece nan carchi di AZV y un recept di nan dokter di cas of specialista.
Pa esnan cu ta desea di cumpra e vacuna esaki tin un costo di Afl 20,- y por haci esaki entre 1:30 cu 3:30 di atardi. Na momento di cumpra mester trece un ID valido y pago ta posibel unicamente via swipe.
Pa mas informacion yama 5224200.
