Un cacho peligroso ta rekeri responsabilidad extra!
ORANJESTAD – Departamento di Salud Publico ta urgi doñonan di mascota pa tuma medida adicional si bo cacho por representa un riesgo.
Esaki ta nifica ser un doño responsabel.
Cualkier cacho por reacciona ora e ta sinti miedo, dolor of menasa. Sinembargo, Hondenverordening ta permiti nomina cierto rasa, crusamento y cacho individual como peligroso, ora nan por representa un riesgo pa siguridad di hende of otro animal.
E ley ta prohibi tene un cacho peligroso sin e permiso necesario. Pa solicita permiso, mester presenta prueba di identificacion di e cacho y un seguro valido di responsabilidad civil.
Na e permiso por conecta condicionnan adicional, manera mantene e seguro, uzo di un bosal ('muilkorf') adecuado riba tereno publico of sterilisacion di e cacho. Un cacho cu ta envolvi den un incidente di mordemento tambe por califica como peligroso.
Responsabilidad extra no ta castigo pa e animal. E ta proteccion pa comunidad, otro animal y e cacho mes. Falta di control por termina den herida grave, confiscacion of otro consecuencia cu por a preveni.
Si bo tin duda tocante clasificacion, permiso of condicionnan aplicabel pa bo cacho, busca informacion oficial prome cu un incidente sosode.
Un doño responsabel conoce e riesgo, ta cumpli cu ley y ta tuma medida na tempo.
Pa un comunidad harmonioso, un doño di mascota responsabel alabes!
Base legal: Hondenverordening, articulonan 5 y 6.
Sea bo tambe un doño di mascota responsabel. Cada acto di responsabilidad ta salba un bida.
Planta amor, proteha nan bienestar y hunto nos por logra un Aruba sin animalnan bandona.
