Un aña di San Nicolas Pop-Up Market ta demostra e forsa den union di comunidad y comercio local

E celebracion exitoso ta marca un aña di crecemento di un iniciativa cu a cuminsa chikito cu 13 vendor y artesano local, pero cu awe, cu apoyo di Gobierno, a crece y bira un punto di encuentro importante pa comunidad y un plataforma pa actividad economico den centro di San Nicolas.

For di su prome edicion na september 2025, e vision di Ministerio di Finansa, Asunto Economico y Sector Primario tabata pa duna e mercado cu ya tabata existente caba un empuhe y pa crea algo mas cu solamente un evento mensual. E meta tabata pa crea un espacio accesibel y recurrente unda comerciante chikito, artesano y productor local por haya oportunidad pa presenta y bende nan producto, conecta cu cliente nobo y crece.

E iniciativa a cuminsa cu apenas 13 comerciante, vendor y artesano local. Ya pa su di tres edicion na november 2025, e mercado tabata conta cu mas di 45 vendor y artesano local, un indicacion di e confiansa cu e concepto tabata generando entre comerciantenan y comunidad. Gobierno a indica na e momento ey cu e mercado ta stimula economia local, ofrece un plataforma na empresario y productor local, y forma parti di e trayectoria di revitalisacion di San Nicolas.

Cada luna, comerciante y artesano ta prepara nan producto, famianan ta bishita Plaza Lolita y hende for di diferente parti di Aruba ta yega San Nicolas pa pasa un rato, come, cumpra y sostene productor local. E resultado ta un actividad cu ta genera movemento den centro di San Nicolas y, na mes momento, ta crea conexion entre comerciante y consumidor.

E vision ta alinea directamente cu e trayectoria mas amplio di revitalisacion di San Nicolas. Gobierno ta combina inversion den infraestructura y espacio publico cu promocion di desaroyo economico local, turismo y comercio. E plan di revitalisacion ta inclui tambe un mercado como parti di e desaroyo di e area.

Den implementacion di e programa, Gobierno a identifica revitalisacion di centro di San Nicolas, promocion di actividad economico local y creacion di un clima cu ta facilita iniciativa priva como elementonan importante di su maneho. Gobierno tambe a introduci incentivonan fiscal pa stimula inversion den centro di San Nicolas y Oranjestad.

Revitalisacion no ta limita na drecha infrastructura of renoba edificio. Un centro di ciudad mester tin hende, actividad, comercio y oportunidad.

E Pop-Up Market ta pone e principio ey den practica. Cada edicion ta crea un motibo adicional pa bishita San Nicolas y ta ofrece comerciante chikito un plataforma concreto pa participa den e actividad economico cu e revitalisacion ta busca pa genera. Cu e prome aniversario celebra exitosamente, e compromiso di Gobierno ta pa sigui fortalece, profesionalisa y haci e San Nicolas Pop-Up Market mas grandi y miho.

“Un aña pasa nos tabatin un idea y un vision. Awe nos tin un comunidad cu ta kere den e iniciativa. E siguiente paso ta pa sigui construi riba e confiansa ey. Nos kier un Pop-Up Market cu ta sigui crece, cu ta crea mas oportunidad pa nos comerciantenan y cu ta trece cada biaha mas hende den centro di San Nicolas,” Minister di Finansa, Asunto Economico y Sector Primario, Geoffrey Wever, a expresa.

Minister Wever ta gradici specialmente tur e vendor, artesano, productor y otro participante cu durante e ultimo aña a pone nan confiansa den e iniciativa.