Tur departamento di Gobierno lo transiciona pa auto electrico
ORANJESTAD – Recientemente a tuma luga entrega di cuater auto electrico na Departamento di Asunto Economico, Comercio y industria (DAECI), den cuadro di e maneho di sostenibilidad di Ministerio di Asunto Economico, Comunicacion y Desaroyo Sostenibel.
Durante di e ceremonia aki, Minister di Asunto Economico Geoffrey Wever, a anuncia cu Gobierno a inicia cu e proceso formal di transicion di tur nan vehiculonan den servicio.
Departamento di Asunto Economico, Comercio E industria (DAECI) ta e prome departamento gubernamental pa pasa den e transicion aki, y pronto lo cambia e fleta di SEDECO, Departamento di Asunto di Telecommunicacion (Directie Telecommunicatie Zaken - DTZ) y Oficina Central di Estadistica (Centraal Bureau voor het Statistiek - CBS), cual proceso a inicia caba. Cu e aprobacion recien den Conseho di Minister pa e transicion completo den Gobierno, Departamento di Obra Publico (Dienst Openbare Werken -DOW) Departamento di Infrastructura y Planning (Directie Infrastructuur en Planning - DIP), Oficina di Servicio Interno (Bureau Interne Diensten - BID), Departamento di legislacion y Asunto Huridico (Directie Wetgeving en Juridische Zaken - DWJZ) etc. pronto tambe lo ricibi autonan electrico.
Union Europeo a traves di GO-Facility, lo aporta cu sosten financiero (€190,000) y tecnico pa e transcision aki. Ademas, Union Europeo lo uza e proyecto piloto di Aruba como un ehempel y guia pa otro paisnan di con por uza fondonan Europeo pafo di e EU.
Gobierno di Aruba tin e rol di ta e 'rolemodel', y cu e decision aki, tur departamento lo bay over na auto electrico unda cu ta posibel. Esaki lo trece un impacto positivo directo na nos comunidad y na fondonan di gobierno door di reduci gastonan cu 14% compara cu autonan tradicional segun estudionan haci. E reduccion di CO2 cu autonan di Gobierno ta emiti lo mehora calidad di bida y promove cuido di nos naturalesa y di mama tera. Electrificacion di transporte ta esencial pa e transicion na energia limpi. Ademas, e lo haci Aruba menos dependiente di combustibel fosil, cu ta fluctua hopi den prijs.
Transicion na vehiculo electronico ta aporta tambe na e Metanan di Desaroyo Sostenibel (Sustainable Development Goals – SDGs), SDG #7; Energia Limpi y Economico, SDG #11; Barionan y Comunidadnan Sostenibel, SDG#12; Produccion y Consumo Responsabel, SDG #13; Accion riba Clima y SDG #15; Bida riba Tera.