Traspaso di Presidencia di Stuurgroep GGZ: Un Paso pa Fortalece Salud Mental na Aruba

Salud mental y cuido di adiccion ta mas cu un reto den cuido; e ta un responsabilidad comparti di nos sociedad.

Pa logra cambionan duradero, e maneho y coordinacion di e cuido aki mester ta firmemente ancra den nos sistema di salud publico y keda independiente di politica. Cu e decision pa structuralmente incorpora Salud Mental (GGZ) y Cuido di Adiccion den e maneho di Directie Volksgezondheid (DVG), Aruba ta tuma un paso importante pa garantisa continuidad, sostenibilidad y un colaboracion mas estrecho entre tur e partnernan den e cadena di cuido.

Den e cuadro aki, ta  transferi e presidencia di e Stuurgroep GGZ for di Ministerio di Salubridad, Asunto Social, Cuido di Adulto Mayor y Maneho di Adiccion pa Directie Volksgezondheid (DVG). Cu esaki, DVG lo asumi e presidencia y maneho di Stuurgroep GGZ, cu ta inclui e coordinacion entre e diferente instancianan. Asina, e desaroyo continuo di maneho y e ehecucion di prioridadnan strategico lo keda structuralmente ancra den e organisacion responsabel pa salud publico.

E traspaso aki ta fortalece continuidad, conocemento institucional y colaboracion entre e diferente instancianan cu ta forma parti di e cadena di cuido. E meta ta un sistema unda prevencion, deteccion trempan, tratamento, recuperacion y reintegracion social ta forma parti di un solo cadena di cuido, cu ta sigui desaroya riba base di conocemento, cooperacion y primordialmente cu enfoke riba bienestar di e pashent.

Salud mental ta un responsabilidad comparti y un inversion den futuro di Aruba.
Hunto nos ta traha pa un Aruba cu un sistema di salud mental fuerte y cuido accesibel pa tur persona.