Trabou di construccion di studentenflat den Oranjestad a inicia
ORANJESTAD – Den cuadro di e proyecto di renobacion di e antiguo edificio di Ministerio Publico cu ta forma parti di e trayecto di renobacion y revitalisacion di centro di Oranjestad, riba 9 di februari 2026, a inicia cu construccion di e studentenflat den centro di Oranjestad.
Ehecucion di e proyecto aki ta un paso importante den e meta di gobierno pa revitalisa e centro di Oranjestad door di renoba edificio y infrastructura.
Presente na e ceremonia di groundbreaking tabata Minister President Mike Eman, Minister di Enseñansa, Gerlien Croes, Minister di Finansa, Geoffrey Wever, Minister di Infrastructura Rene Herde, Directornan di FCCA Julie Wever y Giovanni Anthony, Rector di Universidad di Aruba Sue-Ann Lee, Contratista CH y Arkitecto Raffy Kock.
“Pa hopi aña e edificio aki tabata bashi y pa nos revitalisa e centro di Oranjestad Gobierno a dicidi riba mi peticion pa traspasa e edificio aki na FCCA bou di e condicion cu FCCA ta converti e edificio aki den un studentenflat di mas o menos 25 apartamento pa studiante y ariba e promer piso un espacio pa un restaurant of bar. Mi ta sumamente contento cu FCCA a kere den e vision aki y cu e trabou di renobacion ta inicia awe. Una bes cu e studentenflat aki keda cla nos lo tin mas o menos 25 studiante ta biba den e centro di Oranjestad, cu lo duna un ambiente completamente nobo na nos centro di ciudad. Nos vision ta pa hende biba den Oranjestad y cu e proyecto aki nos ta demostra cu nos ta implementa nos vision”, segun Minister Geoffrey Wever.
Desde 2022 Ministerio di Finansa, Asunto Economico y Sector Primario, FCCA y Universidad di Aruba a yega na un palabracion a base di cual Gobierno di Aruba lo traspasa e edificio di Ex-OM den centro di Oranjestad pa FCCA, y cu FCCA lo renoba e edificio aki den un studentenflat pa asina e studiantenan di Universidad di Aruba por biba den centro di Oranjestad y ta cerca di Universidad di Aruba.
Minister Wever ta gradici FCCA pa kere den e vision pa revitalisa e centro di Oranjestad y pa acepta e reto pa renoba e edificio den un studentenflat y tambe na Universidad di Aruba pa ta parti di e proyecto aki, tur na beneficio di un centro di Oranjestad revitalisa.