Trabao di saneamento tumando luga na Ex-dump Parkietenbos

Dia 31 di december 2022, a cera e dump di Parkietenbos definitivamente pa publico. Esaki ta importante pa por rehabilita e tereno y converti‘e den un espacio cu lo beneficia comunidad y medio ambiente. E prome paso tabata pa stop e fluho di desperdicio pa e sitio, redirigi esaki pa otro compania cu ta ekipa pa maneha e desperdicio cu mas responsabilidad.

Durante 70 aña, e dump di Parkietenbos tabata un simbolo y resultado di practicanan no sostenibel ni responsabel. Candelanan continuamente tabata causa molester grandi pa e bisindario. E cierre aki ta simbolisa un cambio for di un modelo economico linear y tradicional, na un aproximacion circular, moderno y responsabel, cu un bista pa futuro.

E prome paso tabata pa redirigi e desperdicio cu ainda tabata yegando e dump di Parkietenbos, pa otro companianan. Desde 2018, desperdicio residencial y comercial, tabata bay Ecotech FZ. Green waste, construccion y demolicion, metal, taira - tur tabata bay pa diferente compania. Unabes a stop e fluho di desperdicio riba dump di Parkietenbos, Serlimar a cuminsa prepara e tereno pa e trabounan di saneamento.

Serlimar a haci peticion pa un hindervergunning pa cu e trabounan di saneamento cu lo mester tuma luga. A entrega e peticion na DWJZ riba 15 di maart 2023  y Ministerio ta pendiente ainda pa ricibi esaki. Mientrastanto e trabao di saneamento ta para pendiente e hindervergunning.

Ta bay instala “monitoring wells” na varios punto riba e sitio na Parkietenbos pa haya informacion di e subsuela di dump, manera presencia di gas di metano, y stabilidad di e sitio mientras cu trabou ta continua. E “monitoring wells” ademas lo monitoria cualkier contaminacion cu por drenta lama, dunando oportunidad pa mitiga esaki como parti di e diseño di saneamento.

E trabao pa remedia e asbesto, cu a anuncia riba 23 di augustus 2024, lo inclui e construccion di un cel nobo pa asbesto, pa maneha y contene e material peligroso na un manera sigur. Inspeccion a revela e presencia di 27 container di asbesto cu mester maneha cu cuido pa preveni riesgo pa salud durante e trabaonan, pero tambe den futuro.

Trahando cu expertonan di Witteveen + Bos, y expertonan local di DTI, DNM y DVG, a produci e documentonan tecnico pa cu e saneamento di asbestos. Esaki ta inclui un EHS plan – esta un Environmental, Health & Safety plan – cu ta stipula tur e rekisito cu e compania cu lo gana e destaho tin cu tene su mes na dje na tur momento. E EHS-plan tambe ta valido pa tur trahado di Serlimar cu lo ta riba e tereno y cu ta envolvi cu e proyecto.