Temporada di horcan por ta inicio di un menasa pa salud publico

Ta conoci cu e temporada aki ta trece cu ne yobida local cu pa nos flora y fauna ta un bendicion pero tambe por ta inicio di un menasa pa salud publico si como poblacion nos no ta consciente y traha hunto pa minimalisa e risico di malesanan transmiti pa sangura.

Manera ta conoci, sangura mester di awa pa por pone su webonan. Mas awa keda para rond di cas despues di yobida, mas oportunidad e sangura tin pa broei dentro di 8-10 dia. Pa nos por minimalisa e risico cu Aruba por bay experencia brote di malesa transmiti pa sangura manera e.o Dengue, ta importante pa nos tur hunto ataca e problema for di su reis. Esaki ta incera reduci of stop e sangura di sigui broei na cantidad grandi. 

Esaki nos por haci door di:

• Tira afo of warda tur obheto cu por retene awa innecesariamente paden y rond di cas, scol, trabou y alrededor dibo. Por ehempel scoter bou mata, taira, coy hunga pafo y vaas cu mata of flor.
• Tapa tur awa para cu tin proposito manera e.o pa muha mata of duna bestia. Por ehempel hemchi bou airco of bari cu awa di yobida.
• Ta extra alerta riba awa pa muha mata of duna mascota, vaas cu mata of flor, baki awa di bestia, vijver cu mata di lili.

Di dos (2) paso ta proteha bo mes pa bo no haña Dengue, esaki bo por haci door di:

• Bisti paña cu manga y pia largo durante oranan di atardi pa anochi;
• Uza repelente contra sangura riba cuero cu no ta cubri cu paña;
• Den espacio pafo di cas cende un mecha of uza bela contra sangura;
• Cera porta y bentana di cas prome cu bira scur of uza screen;
• Evita di bishita areanan unda bo ta consciente cu tin hopi sangura;
• Spuit paden di cas, camber, oficina y areanan cu bo ta frecuenta regularmente cu producto pa mata sangura.

Di tres (3) paso ta proteha otronan rond dibo ora cu bo tin Dengue of tin sintomanan di Dengue. Esaki bo ta haci door di evita di pica di sangura. 

E sintomanan di Dengue ta entre otro:

• Keintura;
• Dolor di cabes;
• Biramento di stoma y sacamento;
• Dolor di weso, joins y musculo;
• Dolor di wowo;
• Rash riba curpa.

Si bo ta presenta e sintomanan aki, consulta bo dokter di cas pa haci test y pa conseho riba e miho forma di tratamento.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, subi nos website www.dvg.aw, yama nos na 5224200 of mail nos na servicio@dvg.aw.