Temporada di campamento 2024

E fecha riba cual nos campadonan por cuminsa campa ta diadomingo 24 maart 2024 pa 12:00 di merdia.
Kiermen riba e fecha y ora stipula ta permiti pa pone trailernan y tentnan riba banda di e beachnan. Polis lo kita tur obheto cu pone prome cu e fecha y orario stipula 
E ultimo dia di campamento lo ta dia 7 april 2024.
Ultimo dia pa entrega peticion pa campamento ta diaranson 6 maart 2024 entre 08:00 pa 11:30 mainta y entre 01:00 pa 04:30pm na e warda di Polis na unda e districto cu bo lo campa ta ubica.
Despues di campamento mester  kita tur obheto for di beachnan. Si esaki NO sosode polis lo kita esakinan riba gasto di e campado.
Un yamada ta bay na un y tur pa mantene nos beachnan limpi. Deposita tur desperdicio den bari di sushi of den saconan di plastic.

A añadi extra rekisito na e permiso p’esey tene cuenta cu e siguiente condicion cu nos ta splica aki bao:
1.     Ariba e santo blanco na e beachnan bao ningun circumstancia ta permiti pa haci B.B.Q., na otro sitio por haci B.B.Q. solamente cu B.B.Q. pit di gas.
2.    Tent y trailernan cu ta uza pa campa mester ta den bon condicion. Mester pone nan por lo menos 10 meter for di canto di lama y nan mester pone por lo menos 5 meter for di e caminda publico. Si NO cumpli cu e regla aki, polis lo kita nan.
3.    Bao ningun forma ta permiti pa reserva tereno pa campamento.
4.    No por pone trailer y otro obhetonan cu ta uza pa campa y riba otro lugarnan cu ta e lugarnan cu ta destina  pa esakinan y di cual lugarnan ta destina pa Gobierno.
5.    Den e tentnan/trailernan mester tin suficiente recurso pa loke ta trata dunamento di prome auxilio. (E.H.B.O.)
6.    Ta prohibi pa pone na tent/trailer, obhetonan of plachinan cu no ta cuadra cu moralidad.
7.    E campamento mester sosode segun e condicionnan bao di a otorga cual e permiso.
8.    Ta prohibi pa core cu vehiculonan di motor, bicicleta, cabay y garoshi riba nos beachnan y principalmente na lugarnan caminda ta destina pa publico.
9.    Ta prohibi di pega candela riba nos beachnan.
10.    Ta prohibi di bende cuminda, softdrinks, mixed drinks, of cualkier otro tipo di articulo ariba beach sin permiso.
11.    Por toca musica solamente for di den e trailer of tent den siman te 10:00 p.m y den weekend te cu mey anochi di tal manera cu no ta molestia otro campadonan. E uzo di sound system/amplifiers etc. ta permiti solamente si otro campadonan no ta sinti molester di esakinan.
12.    Ta prohibi pa kap mata, sin permiso.
13.    Ta prohibi pa core cu boto y pa ancra esaki den e zwemzone. Tambe ta prohibi pa mara boto na e boeinan cu ta destina pa scheepvaart.
14.    Ta prohibi uzo di pallet y carton ariba beach. No cumpli cu e regla aki polis lo kita esakinan.
15.    Ta prohibi pa uza e beach of e palo di coconan como toilet.
16.    Ta prohibi pa tin cabay y cacho riba beach.
17.    Ta prohibi pa e campadonan uza e hutnan pa nan campa, tin cu laga nan liber pa e personanan cu ta bin pasa dia.
18.    Bao ningun circumstancia mag di susha e beachnan. No mag di laga boternan kibra of splinter di glasnan atras ariba beach, ni tampoco por tira esakinan den lama. Esaki ta conta pa desperdicio tambe.
19.    No mag di pasa permiso pa un otro persona.
20.    E poseedo di e permiso mester tin esaki den su tent/trailer na un caminda visibel pa polis.
21.    E poseedo di e permiso mester tene cuenta cu e tin solamente derecho riba e lugar di campa durante e tempo cu efectivamente e ta campando, prome cu esaki bo no mag di reserva, marca, pone cabuya ect.
22.    E poseedo di permiso ta keda responsabel pa cualkier daño na otronan debi na existencia di su tentnan/trailer of otro objeto.
23.    Mester sigui estrictamenta indicacionnan di polis duna na interes di orden publico y siguridad di persona, bienes y basa riba moralidad.
24.    Esun cu no actua conforme e condicionnan bao di cual a otorga e permiso, ta considera cu e la actua sin permiso. Lo revoca e permiso y bo por haya un multa.

Sigui tur reglanan y pasa un dushi temporada. Nos di Cuerpo Policial Aruba lo controla durante campamento na tur parti di nos isla.